Shillong, Nailar 25
Ki nongïalam ka Khasi Students Union (KSU) na South Khasi Hills District ha ka 25 tarik u Nailar 2025 ki la leit ban ïakynduh ïa u Chief Executive Member (CEM) ka Khasi Hills Autonomous Dis-trict Council (KHADC) u Bah Shemborlang Rynjah ban ïakren halor kiba bun tylli ki mat kiba ïadei bad ka jingktah ïa ka thaiñ Sohra.
Haba kren sha ki lad pathai u Bah Rebokstar Diengdoh President ka KSU, SKHD u la ïathuh ba ki mat kiba ka seng ka la wanrah ban ïakren bad u CEM kidei ki mat kiba ka seng hi ka la ju dep ban pynsngew la bunsien ha ki CEM ka KHADC.
U Bah Rebokstar Diengdoh u la ong ruh ba ka seng ka la pan jingshai ruh na u CEM ha kaba ïadei bad ka jingai Labour Lisen ïa ki bar jylla.
Ha ka jingleit ban khynra ka seng ïa ki kot ki sla jong ki bar jylla, ka KSU ka la lap ba ha kane ka Labour Lisen ki bar jylla ki siew haduh T.700 marwei na ka bynta 15 sngi sha ka District Council, u la ong.
U Bah Rebokstar Diengdoh u la ong ruh “ngi la buh jingkylli halor kane ka kam bad ban wad jingtip na u CEM, ba la u don jingtip ne-em ïa kane ka jingai slip 15 sngi ka KHADC sha ki bar jylla kiba wan trei ha ka thaiñ Sohra hynrei na ka liang u CEM pat u la ong ba un sa ïakren halor kane ka kam ryngkat u EM ba dei peit ïa ka Trade bad ki ophisar ruh.”
U la ong ruh ba ka seng ha ka jingkhynra ka la dep beh palat 150 ngut ki bar jylla kiba don ïa ka slip bad ki la buh jingkylli “hato ka la poi katno tyngka ka pisa ba ka District Council ka la shim T.700 marwei”?
“Kane kadei ka sien kaba nyngkong eh ban ïohi ïa kum kine ki slip ba la pyllait da ka KHADC ban kut noh ka por tang 15 sngi bad ban shim pisa ha ka dor T.700 u wei u briew” la bynrap u Bah Rebokstar Diengdoh.
Na ka liang ka seng ka la kyntu jur ba nangne shakhmat kim dei ban ai shuh ïa ka Labour Lisen na ka bynta kito kiba shu ïarap ne ki ‘helper’ hynrei kin ai tang ïa kito kiba u Khasi um lah ban trei. Da kaba maham jur ruh ba lada don kiba shim kabu lane pynkheiñ, u CEM u dei ban pynshitom ïa ki da kano kano ka lynti ruh” u la ong.
Shuh shuh u la ong ruh ba la donkam ban pynkhlaiñ ïa ka MRSSA namar ba kane ka aiñ ka sting palat, bad ka District Council ruh ka lah ban shna ïa ki aiñ kiba khlaiñ ha ki jaka kiba hap hapoh ka 6th Schedule.
U Bah Rebokstar u la kyntu ïa ka EC, ba haba la jied ïa ki da ki paidbah ki donkam ban pynkylla ïa ka aiñ kiba lah ban pynkylla bad dei ban pynduh pyndam noh ruh ïa ki aiñ kiba rim kiba long kiba bakla.
Ha kane ka sngi ka seng ka la ïoh ruh ban ïakren halor ka jingseng ïew ki bar jylla ha ka thaiñ Sohra.
Halor kane na ka liang u Bah Rebokstar u la ong ba ha kine ki thaiñ ka la long kaba la ishyrkhei haduh katta katta namar khlem ka jingïoh jingbit na ka District Council ruh ki bar jylla ki nud beit ban seng ïew. Kumta ngi la dawa na ka District Council ba kadei ban khang khyrdep noh shisyndon ïa ki ïew la ka dei ha Mawïong, Majai, Shella bad kiwei kiwei ki jaka kiba pynmih jubor da ki bar jylla, la bynrap shuh shuh u Bah Rebokstar. Nalorkata, ka KSU ka la dawa ruh ba ka District Council kadei ban pyndam noh ïa ki kyrteng jong ki shnong ha kane ka thaiñ kiba la jer ha ka ktien dkhar, halor kane u Bah Rebokstar u la ïathuh ba na ka liang u CEM u la kular ba un sa shimkhia bad un sa khot da ka jingïalang bad ki khlieh nongsynshar bad ki nongïalam shnong ruh kumjuh.
“Ka seng hi kan sa nangïai khynra shuh shuh ïa ki kot ki sla jong ki bar jylla bad ka seng ka la kyntu ruh ïa u CEM ba un ïasnohkti lang bad ka KSU ban leit khynra ïa ki kot ki sla ki bar jylla ha katei ka thaiñ.” U la pynkut.
