Shillong, Nailar 25
Ka Umlyngka SC ka la lah ban pynthikna ban jam sha ka final ha ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA) hadien ba ka la lah ban pynliem noh ïa ka Umrynjah SC lyngba ka tie-breaker da 4-3 kol ha ka lah sngi U Blei.
Ha kane ka jingïakhun semi final kaba nyngkong kaba la long ha SSA Stadium kaba ha First Ground Polo, kine ki kynhun ki la pyrshang ban ïakhun tyngeh naduh kaba sdang, hynrei haduh kaba kut kim shym la lah ban thep kol.
Kumjuh hadien ba la ailad ba kin bteng biang sa ïa ka ‘extra time’ kitei ki kynhun kim shym la lah ban pynkhih jar. Dei lyngba ka jingïashut tie-breaker ba ka Umlyngka SC ka la lah ban tam da 4-3 kol ïa ka liang pyrshang bad ban khur syndon ïa ka jingjop.
Lyngba kane ka jingjop, ka Umlyngka ka la pynthikna ruh ïalade ban jam sha ka Second Division jong u snem ban wan.
Kawei pat ka jingïakhun semi final kaba ar kan long hapdeng ka Madan S&CC pyrshah ïa ka Mawkriah West SC ha ka por 2:45 nohphai sngi.
