Super Division: Lyngba ka hat-trick u Sumar pynjem khnap ka Lumphyrnai Sohphoh ïa ka Pohskur

Katba ïa ki ar kol jong ka Pohskur Plongïingkhaw la thep da u Jendeng Mukhim (18) bad u Samboi Mukhim (81).

Jowai, Nailar 25

Ka hat-trick ba la ïoh da u Sumar Suting ka la biang pura ïa ka Lumphyrnai Sohphoh ba kan pynliem noh ïa ka Pohskur Plongïingkhaw haduh 7-2 kol ha ka lympung ïalehkai Super Division (Kelsiroy Pala Memorial Football Tournament) ba la pynïaid da ka Thadlaskeiñ Sports Association (TSA) ha ka lah sngi U Blei ha Wahïajer Multi Sports Complex.

Ka jingïoh u Sumar ïa katei ka hat-trick ka la wan hadien ba u la ïoh ban thep ha ka minit kaba 47, 54 & 90+3. Ïa ki ar kol la thep da u Pynbiang Mynsong (29 & 43), katba ïa kiwei pat la pynbud da u Risuk Suting (12) bad Wellson Suting (51).

Katba ïa ki ar kol jong ka Pohskur Plongïingkhaw la thep da u Jendeng Mukhim (18) bad u Samboi Mukhim (81).

Haba phai sha ka jingïalehkai 2nd Division (Joybell Suiam Memorial Football Tournament) kaba la long kham hashwa, ka Bamkamar Wah ka la jop da 2-0 kol ïa ka Thadmynri. Ïa kine la thep da u Ïaishah Nongrum ha ka minit kaba 19 bad u Sbun John Langshiang (28).

Ha ka jingïalehkai kaba bud, ka Lumkynsaw ka la jop da 2-1 kol ïa ka Hunlang-I Moobakhon. Kane ka nam jop ka la wan urlong lyngba ki ar kol ba la thep da u Jonan Suting ha ka minit kaba 2 bad 8, katba ka Hunlang Moobakhon ka la pynphai shi kol da u Ritikna Lamare (57).

Ha ka sngi Ba-ar ka jingïalehkai 2nd Division kan long hapdeng ka Mukhla Nongrim pyrshah ïa ka United PlongÏingkhaw ha ka por 10 baje mynstep, ka Mukhla Sohshrieh ïa ka Maya Club Umjlasiaw ha ka por 12 baje mynsngi, katba ha ka Super Division ka Wahïajer pyrshah ïa ka Niriang SC ha ka por 3 baje nohphai sngi.