Shillong, Nailar 25
U MP ka Congress na Tura, u Saleng A Sangma u la tyrwa sha ka Sorkar Pdeng ban pynïar ïa ka steshon rel Mendipathar sha ki nongbah kiba heh kum ka Kanyakumari, Mumbai, New Delhi, bad Kolkata.
U Saleng u la kyntu ruh ïa ka Sorkar Pdeng ban wanrah ïa ki rel kit mar sha rilum Garo, da kaba pynpaw ïa ka jingdonkam jong ka na ka bynta ka jingroi jong ki karkhana bad ka jingseng kam seng jam.
“Nga la kyntu ïa ka Sorkar Pdeng ban pyrkhat ba ka rel kaba stet bha ka dei ban pynïasoh na Mendi-pathar sha Kanyakumari, sha Mumbai, sha New Delhi bad Kolkata. Hadien ba la peit ïa ka jinglong jingman ha rilum Garo, nga la kyntu ban pynïoh ïa ka rel kit mar, ha kaba u Myntri Rangbahduh bad u Myntri ba dei khmih ïa kane ka tnat, ki la mynjur bad ong ba kin sa peit halor kane ka kam. Katba ym pat ïoh ïa ka rel kit mar na Mendipathar, ka rilum Garo kan nym ïoh satia ïa ka jingmyntoi na kata,” ong u MP haba kren sha ki lad pathai khubor ha ka sngi Nyngkong.
U Saleng u la pynpaw ïa ka jingmyntoi ha ka ïoh ka kot kaba lah ban mih na ka jingpynbha ïa ka jingpynïasoh rel, kynthup ïa ka jingshalan ïa ki mar rep ba la pynmih na rilum Garo sha kiwei pat ki bynta jong ka ri. U la ong ruh ba ïa ki mar rep jong ka thaiñ lah ban pynïaid ïew bad die ha ki nongbah kiba heh, ka ban kyntiew ïa ka ïoh ka kot jong ka thaiñ.
Katkum ka jingong jong u, ka steshon rel Mendipathar mynta ka treikam tang hapdeng ka Mendipathar bad Guwahati, khlem da don satia ïa ki rel kit mar.
U MP u la pynpaw ïa ka jingsngewkhia halor ka jingshngaiñ bad ka jingwan ki briew lada pynïar ïa ka lynti rel sha kiwei pat ki bynta jong ka rilum Garo. U la ban ïa ka jingdonkam ban don ki jaka talasi kiba biang ban pynthikna ïa ka jingshngaiñ jong ki nongshong shnong.
“Ha ka jingshisha haba phi kren shaphang ka jingwan rung briew, ka rel ka rung tang 14 km haduh Mendipathar na ki khappud jong ka Assam bad haduh mynta ym pat don bun ka jingwan rung briew hynrei lada ngi shna ïa ka jaka kaba kham heh te ngi lah ban hap ban peit sha ka liang ka jingpahara ruh,” la ong u Saleng da kaba bynrap “Dei na kata ka daw ba ngam pan ban pynjlan ïa ka lynti rel shaduh Jengjal lane sha kiwei pat ki bynta jong ka rilum Garo hynrei nga kwah tang ha kaba ïadei bad ka steshon rel ha Mendipathar bad ka jingpynïar ïa ka jingïaid lynti sha kiwei pat ki bynta jong ka ri.”
