Guwahati, Nailar:
U Myntri Rangbah ka Assam, u Himanta Biswa Sarma, ha ka sngi U Blei, 24 tarik u Nailar, u la kren tyngeh ha kaba ïadei bad ki jingphiah ïa ka jylla, da kaba pynbna ba ïa kito kiba shah beh shnong na ki jaka ba la shah ktah, yn ym pynrung ha ka thup nongthep vote.
Haba ïakren bad ki lad pathai khubor, u Sarma u la kynnoh ba ka “modus operandi” jong kiba buhai shnong beaiñ ka long ban shu thom suki suki ïa ka Upper bad North Assam, kaba ïasyriem bad kaba u la batai kum ka jingkylla ha ka jingbun briew ha Middle bad Lower Assam.
“Nyngkong eh kito kiba shah beh shnong kin ym rung ha ka thup nongthep vote.Ka modus operandi jong ki ka long ban thmu ïa ka Upper bad North Assam.Ngi dang ïaleh katba lah ban ïada ïa ka Upper Assam khnang ba kan nym ïakynduh ïa kajuh ka jingeh kum ka Middle bad Lower Assam. Ka pateng Lowerrma jong ngi ryngkat bad kaba ha shuwa jong ngi, kim lah treikam na ka bynta ban ïada ïa ka Middle bad Lower Assam,” la ong u Sarma.
U Myntri Rangbah ka jylla ula bynrap shuh shuh da kaba ong, “Hynrei mynta, ngi la kut jingmut ban ïada ïa ka Upper Assam. Tang shu shah beh shnong, ïa ki kyrteng jong ki yn sa weng noh na ka thup nongthep vote.”
Ka jingkren jong u Sarma ka wan ha ka por ba ki jingpynkynriah briew ki la nang jur ha kylleng ki distrik bapher bapher jong ka jylla, kaba la pynmih ïa ki jingïakren halor ka hok halor ka khyndew ka shyiap, ka jingwan buhai shnong, bad ki jingeh ha ka jingbun briew. Ki jingkren jong u ki lah ban wanrah ïa ki jingkynthoh kiba jur ha ka saiñ hima sima shwa ka ilekshon sha ka Ïingdorbar Thawaiñ ha u snem 2026, ha kaba la khmih lynti ba ki mat jong ka khyndew ka shyiap bad ka jinglong kyrpang kin dang long ka pdeng jong ka jingïakren saiñ hima-sima jong ka Assam.
