Shillong, Nailar 26
U Myntri Rangbah ka Jylla, u Conrad K Sangma u la ong ba ka Sorkar jong u ka angnud ban wad ïa ki lad ki lynti ban weng ïa ka jingeh ha khappud hapdeng ki jylla na ka bynta ban pynthikna ïa ka jingsuk kaba neh slem.
Haba kren bad ki lad pathai khubor ha ka Sngi Ba-ar, u Myntri Rangbah u la ong ba ka la don ka jingkynjah ha ka jingïakren pud hapdeng ka Meghalaya bad ka Assam ha kine ki 46 snem ba la dep.
“Khatduh eh, ngi (Sorkar MDA) ngi la sdang ïa ka jingïakren. Nga tharai phi lah ban ai ka burom ïangi kaba kat kata. Kam long kaba suk, ka long kaba eh. Kumta kano kano ka jingkynjah kaba la don haduh 46 snem, ngi pyrshang ban pynbha ïa ka bad ngin dang ïai bteng ban trei halor jong ka,” u la pynpaw.
“Ha ka sien kaba nyngkong ka don ka Sorkar kaba trei shisha ïa kane ha ka rukom kaba hok bad kaba shisha bha. Kam pat ju don mynno mynno ruh. Hato ngi lah ban wad ïa ki lad ki lynti ban weng ïa baroh, lehse em. Kam long kaba suk kumta hynrei hato ngi pyrshang? Hooid, ngi leh bad ngin ai ïa kaba bha tam namar ngi kwah ïa ka jingsuk kaba neh slem,” bynrap biang u Myntri Rangbah.
Haba ïadei bad ka jingjia dang shen ha Maikhuli ha Ri Bhoi district, u Myntri Rangbah u la ong ba watla ki la don ki jingsngewkhia bad ki jingjia, hynrei mynta ka jinglong jingman ka don hapoh ka jingtehlakam.
U Myntri Rangbah u la ban jur ba ka mat ïakren khappud ka dei kaba jylliew bad kaba pynsngewsih, kaba don ïa ka histori kaba la neh palat 52 snem, bad ban wad ïa ka lad kaba neh kan donkam ïa ka por bad ka jingpyrshang.
U Myntri Rangbah u la kdew ba ka la don ka jingïasngewthuh jingmut hapdeng ki bor synshar jong baroh ar tylli ki jylla bad ki paidbah ha ka jinglong kyllum, kaba la ïarap ban pynbeit ïa ki katto katne ki jingeh.
“Hapdeng kane ngi kwah ban ïohi ba ki briew kiba sah ha kane ka thaiñ kin lah ban im ha ka rukom kaba suk. Ki don beit ki jingïakynad, hynrei kata ka dei ka jinglong jong ka jingeh hynrei nga pyrkhat ha ka jingïalang, ngi ïaid ha ka lynti kaba dei bad to ngin peit kumno kiei kiei kin ïaid ha ki por ban wan,” u la pynpaw shuh shuh.
