Shillong, Nailar 26
Ka Smit SC ka la pynjem khnap ïa ka Umphyrnai SC haduh 9-1 kol na ka bynta ban khur ïa ka jingjop ha ka Second Division Football League 2025 ba la pynïaid da ka Shillong Sports Association (SSA) ha ka sngi Ba-ar ha SSA Stadium kaba ha First Ground, Polo.
U Samlanghaki Warlarpih, Nathaniel Kharbyngngar bad u Bhakupar Rynjah ki la ïoh ban thep mar ar kol na ka bynta ban khur ïa ki lai point ha ka Group-B.
Ha kane ka jingïakhun ka Umphyrnai ka la pyrshang ban ïalehkai bha naduh kaba sdang ha kaba ka la pynkhih jar nyngkong eh lyngba u Teibok Nongrim ha ka minit kaba 10. Hynrei hadien san minit ka Smit ka la lah ban pynphai kylla haduh ar kol lyngba u Samlanghaki Warlarpih (15 & 16) na ka bynta ban tam da 2-1 kol ha ka kylla step.
Hadien shi minit ba la bteng ïa ka jingïakhun jong ka kylla miet, ka Smit ka la ïoh ei shi kol na ka daw ka jingbakla thep hi da u rangïalehkai ka liang pyrshah u Emimos Kharkongor. Kane ka jingïoh ban thep kol ka la pynlong ïa ki rangïalehkai kane ka kynhun ban nangïoh mynsiem ha ka rukom ïalehkai bad la thep biang sa ar kol lyngba u Nathaniel (54 & 59).
U Bhakupar u la ïoh ban thep ar kol na ka bynta ka Smit ha ka minit kaba 66 & 84 lem bad u Pynshngaiñborlang Nongrum (68). Hashwa ban wai kane ka kynhun ka la thep biang ïa ka kol kaba khyndai bad kaba khatduh lyngba u Banmonbha Mawlong (80) na ka bynta ban khur syndon ïa ka jingjop.
