Shillong, Nailar 26
Kan dei ka sien kaba nyngkong eh ïa ka Meghalaya State Olympic Associa-tion (MSOA) ba kan lum lang ïa ki ar tylli ki synjuk ïalehkai Kickboxing ka Jylla, ha ka sngi Ba-ar bad ban ai jingmut ba kin ïathaw noh tang da kawei ka synjuk ïalehkai.
Ïa kane ka jingïalang la pynlong ha Conference Hall jong ka shlem treikam ka MSOA ha J.N Sports Complex, Polo. Ki ar tylli ki synjuk ïalehkai ki long ka Meghalaya State Kickboxing Associa -tion (MSKA) hapoh ka jingïalam u Bah Lorenzo Pearson Warjri bad ka All Meghalaya Kickboxing Association (AMKA) hapoh ka jingïalam u Bah Samuel Hashah, kiba la phah jingthoh na ka bynta ban ïoh ka jingithuh (affliation) na ka MSOA.
Kat kum ka kyrwoh ba la pyllait da u General Secretary, MSOA u Bah Finely Lad Pariat, la ong ba ha kane ka jingïalang kaba la neh haduh ar kynta, la ai jingmut ba baroh ar ki synjuk kin ïasoh lang da kaba thaw lad ban ïapynbeit kumno ban don tang kawei ka synjuk ïalehkai hapoh ka Jylla Meghalaya khnang ba kan nym ktah ïa ki khynnah ïalehkai.
Ha katei ka jingïalang la pynïaid da u Bah John F, Kharshïing, Working President ka MSOA, ha ka jingïadonlang u Bah Finely, Bah Ksan Warjri, Treasurer ka MSOA, Bah Dipshon Ryntathiang uba long u dkhot, bad ki nongïalam jong kitei ki synjuk ha ryngkat u Asst. Director ka tnat ïalehkai u Bah Païa B. War Nongbri.
Haba pyrshang ban ïakren bad ki nongïalam jong kitei ki ar tylli ki synjuk ïa mynta kim pat kwah ban pynpaw eiei namar ka dangkloi palat ban ïamynjur ïa katei ka jingai jingmut ka MSOA, hynrei ha kawei pat ka liang ki long ba la kloi ban ïamynjur na ka bynta ka jingbit jingbiang jong ki khynnah ïalehkai.
Ym lah ban len bad kitei ki ar tylli ki synjuk (MSKA bad ka AMKA) ki la lah ban sei ïa bun bah ki khynnah ïalehkai kiba kynsai bad kiba la paw ha ki lympung ïalehkai (national) bad wat shabar ri ruh kynjuh (international). Kaba sngwtynnad ka long ba ha man ba ki leit ïashim bynta shabar Jylla, ki khynnah ïalehkai jong kitei ki synjuk kim ju wanphai thylli sha ka ïing khlem da ïoh takma.
Watla ka AMKA ka ju phah ïa ki khynnah ban leit shim bynta ha ki lympung ïalehkai shabar Jylla bunsien ka ju pynlut nalade bad kam pat ju ïoh ïa ki lad jingïarap la ka long na ka Sorkar Jylla, hynrei ka MSKA ha kine ki khyndiat snem ba la lah ka la ïakynduh jingeh ha ka liang ka jinglut jingsep na ka bynta ki khynnah kiba leit ïashim bynta shabar Jylla bad wat shabar ri ruh kumjuh.
