Shillong, Nailar 26
Ka kynhun ki samla ka Seng Khasi Ri-War Mihngi, ki la long ki lahduh ha ka rynsan ïakop jingkyntip (Inter Tnat Seng Quiz Competition) jong ki tnat Seng Khasi, ïa kaba la pynlong da ka Literary Committee jong ka Seng Khasi Kmie, kaba la long ha Auditorium Hall jong ka Seng Khasi Higher Secondary School, Jaïaw, Shillong ha ka 23 tarik mynta u bnai.
Kane ka jingïakob ka long kum shi bynta jong ka jingrakhe ka Seng Khasi Kmie ïa u Mawmer jong ka jingdap ba 125 snem pura jong ka Seng. Ha kane ka kynti, ïa ka tnat Seng Khasi Ri War la mihkhmat da Wandarilin Thabah bad Babiang Suting.
Ka kynhun kaba wan ban bat ïa ka kyrdan kaba ar dei ka tnat Seng Khasi Malki ba la mihkhmat da Barijuban Lyngdoh bad Saphira Kharmalki. Katba ka tnat seng kaba la wan ban bat ïa ka kyrdan kaba lai dei ka Seng Khasi Pynthorumkhrah, ba la mihkhmat da Rangsankuparbok Majaw bad Shristi Rani.
Ïa kane la ai nam ai burom ha ka kyrteng jong u Rangbah D.K. Dkhar (Bam kwai ha dwar u Blei), ba dei u President barim ka Seng Khasi Kmie, ha kaba ki khun ki kti jong une u rangbah, ki la wan shakhmat ba kin ai ïa ka jingkyrshan bad ban ïa sakhi lang ïa kane ka prokram.
Nalor kata, la wan ruh ban sakhi lang da President bad General Secretary ka Seng Khasi Kmie, Rgh O. Pyngrope bad Rgh Hainess Marbaniang, nangta ki Vice President, ki dkhot ka Seng Khasi Kmie ryngkat ka Seng Kynthei bad Seng Samla Seng Khasi Kmie bad kiwei ruh ki para riew seng na kiwei pat ki tnat.
La ïoh ïa ka jingkren maitphang na u Rgh. Dipshon Lyngdoh Nongbri, Vice President bad Chairman, Literary Committee, Seng Khasi Kmie bad la pynïaid ïa ka jingïalang bad ïa ki kyntien ai khublei la ai da I Dr. Badarishisha Kharwanlang, Secretary, Literary Committee, Seng Khasi Kmie.
Ïa kane ka Inter Tnat Seng Quiz Competition la pynïaid da ka Literary Committee, Seng Khasi Kmie bad la sam ïa ka song pisa, trophy bad ki takma sha ki nongjop da ki khun u Rangbah D.K. Dkhar (BKHDB), bad ki nongïalam jong ka Seng Khasi Kmie.
