Shillong, Nailar 26
Ki kam runar ki la nangjur bad wat ha ka por mynsngi mynshai ruh ym don jingshngaiñ shuh bad ïa kane la sakhi na ka jingshah lute jong kawei ka khynnah skul ha ki runar kiba la pynap syndon da ka tari.
Kane ka jingjia shah lute jong kane ka khynnah skul ba dang 17 snem, kaba la shah lute ruh T.300 ka la jia hajan jong ka Aprilia Show-room, kaba don ha Lumiablot, Nongthym-mai ha ka janmiet jong ka sngi Nyngkong.
Ka tyllong khubor ka ïathuh ba kane ka khynnah kaba pule ha skul Auxilium, Nongthym-mai, ka dang wan phai na skul ha ka por 2:30 eiei janmiet ha ka por ba jia kane ka jingjia. Katkum ka ejahar bala ujor da ka Kmie jong kane ka khynnah, ki runar bala ïarap da 3 ngut kiba donkti lang, kila khynra ïa ka pla skul bad ka pla sopti shuwa ban shim ïa ka pisa.
Ïa kane ka khynnah la ïalam noh sha Civil Hospital, Shillong, ban leh medical bad la pyllait noh hadien ba khmih bniah da ki doktor. Ki Pulit kila register ïa ka case bad kila leit sha katei ka jaka bad ki dang bishar ïa ki kor CCTV na ka thaiñ ban lapdien ïa ki runar.
