
Shillong, Nailar 26
Ka Sorkar Meghalaya kala rai ban thaw ïa lai tylli ki sub-committee ki ban ïakren bad ka GHADC, KHADC bad JHADC, halor ka rai jong ka ban siew tulop hi noh ïa ki Nongtrei jong kine ki Autono-mous District Council (ADC) naduh ka 1 tarik Naiwieng, 2025.
Kine ki komiti kin khmih ruh ïa ki lad ki lynti ha kaban pynbeit ïa ki jingeh kaba kine ki lai tylli ki District Council ki mad ha ka liang ka pisa pilaiñ bad ka rukom pynïaid kam, haba pynthikna ba kin bat pat ïa ka jinglong laitluid bad ka bor bala pynkup da ka Riti Synshar ka Ri.
“Ka sub-committee kan ïakren bad kine ki lai ADC ha kine ki 45 sngi ban wan bad ban aiti ïa ka kaiphod sha ka Sorkar Jylla,” ong u Myntri Rangbah ka Jylla u Conrad K Sangma haba ïakren bad ki lad pathai khubor hadien ba la wai ka jingïalang jong ka Kynhun Myntri ha ka sngi Ba-ar.
“Ka Sorkar kan sa shim ïa ka rai haba pynshong nongrim ïa ki kaiphod ba ïoh na ki sub-committee ba kumno yn pynïaid shakhmat ïa ka kam bad kawei pa kawei ka ADC,” u la ong.
U Myntri Rangbah u la kren ruh da kaba shai ba ki ADC ki don ïa ka bor ban kyntait ïa kine ki jingtyrwa da kaba ong, “Kane kam dei kaba long kongsan. Kane ka dei eh ka kam ba ïadei bad ka jingdon ïa ka pisa tyngka kaba biang jong ki Council”.
U la kular ba ka Sorkar kan ym tuklar satia ïa ka jingtreikam jong ki Council, kynthup ki kam jaka puta, ka hok tynrai, bad ki bor bala pynkup ha ka Riti Synshar ka Ri.
“Namar kata, ka jingkylli kam mih satia bad kam don ruh ka lynti ïa ka Sorkar Jylla ba kan leit ha ka ban mushlia ïa ki jingtreikam jong ki ADC,” u la ong haba pynpaw ba ka Sorkar kan ai ïa ka jingkyrshan pisa sha ki ADC, kynthup ka jingpynsiew ïa ka tulop ki nongtrei, bad kiwei kiwei.
Ki ADC kin hap ban don ïa u/ka Principal Secretary, kaba bha eh u/ka ophisar MCS bala rangbah ne ophisar IAS, ki ban khmih ïa ka rukom pynïaid ïa ka pisa pilaiñ bad pynthikna ba ïa ka pisa la pyndonkam beit thik na ka bynta ka tulop bad ban wanrah ïa ka jingpynkylla ha ka rukom pynïaid ïa ka kam pisa pilaiñ.
“Ngi don ka jingsngewkhia halor ka jingbym biang thikna ka pla pisa tyngka jong ki ADC. Kumta, ngin sa bthah ïa ki Council ba kin don ïa u/ka Principal Secretary kiba lah ban dei ki ophisar MCS bala trei slem ne ki ophisar IAS ban khmih halor ka rukom pynïaid ïa ka pisa tyngka jong ki Council khnang ban pynthikna ba ka pisa ba ai, la pyndonkam beit thik tang na ka bynta ka tulop bad ki jingpynkylla ha ka rukom pyniaid ïa ka pisa pilaiñ kum ka service rules, financial rules, procurement policy-kaba long kongsan namar ka thungkam thungjam bad kine kiei kiei baroh ki dei kiba lam sha ka jingbym biang thikna ka pla tyngka jong ki Council,” ong u Conrad.
Haba kheiñ ïa ka rai jong ka Sorkar kum kaba kongsan, u Conrad u la ong ba ki ADC khamtam ka GHADC kala ïakynduh ïa ka jingkyrduh pisa kaba jur bha, namar ka jingïapher bak-ly-bak hapdeng ka jinglah pynmih pisa bad ka jingdonkam ïa ka pisa ban siew tulop. “Mynshem snem, ka GHADC ka donkam ïa ka jingsiew tulop ba kot haduh T.70 klur katba ka jinglah pynmih pisa ka long hapoh ka T.25 klur. Kumta ngi ïakren hangne ïa ka jingduna pisa ba T.40.45 klur. Kumjuh ruh ha JHADC, ka don ka jingduna ha ka jingpynmih pisa bad kumta ka Council kam lah ban siew ïa ka tulop. Ka KHADC ka kham biang ha kine ki 15-20 snem, kam shym la thungkam palat.Ka jingdon ki nongtrei ka long kumba 800 ngut,” u la ong.