Shillong, Nailar 26
Haba pynpaw ïa ka jingsngewkhia halor ki kam lehnoh hapoh ka Jylla, u Myntri Rangbah u Conrad K Sangma, u la ong ba watla na ki jingtip ba la lum da ki tnat syntiat ka pyni ba kiba bun ki kam bapher bapher ki dang ïaid shakhmat, hynrei ka dang kloi palat ban ïakren halor ka jingsdang ïalum biang jong ki riew kiengatiar.
Katkum ka jingong u Conrad, ka jinglong jingman ha ki thaiñ khappud bad ka ri Bangladesh kala kylla bha ha kine ki snem kiba la leit, kaba la wanrah ïa ki jingkylla kiba mih kiba donkam ban buddien bha.
“Ka Sorkar kala ïoh pdiang ïa kiba bun ki jingtip na ki tnat syntiat manla ka sngi, ïa kaba donkam pat ban pynshisha bad pynthikna hashwa ban ai kano kano ka jingkren pynkut halor kitei,” la ong u Conrad haba kren sha ki lad pathai khubor ha ka sngi Ba-ar.
Kila don katto katne ki kynhun kiba la sdang treikam ha ki snem kiba la dep bad ka long thik kum ki kynhun jong ki nonglute ym kum kita ki kynhun kieng atiar.
“Ngi hap ban sngewthuh bad ban kynmaw ïa ka jinglong jingman ha ki bynta jong ka thaiñ khappud bad ka ri Bangladesh kam long shuh kumba ka long ha u snem ba la dep. Kumta kan don beit ka jingthmu bad nga ngam pat kwah ban kren palat namar ba ka dei ka mat jong ka jingshngaiñ ïa ka ri. Kumta ngam lah ban kren ne ai ïa ki jingtip, hynrei kaei kaba nga lah ban ong, ka long ba ki don katto katne ki jingjia kiba jia bad ki don kiei kiei kiba pher ha kylleng ka thaiñ khappud kila sdang ban mih kiba la pynkylla ïa ka jinglong jingman baroh kawei,” u la ong.
“Mynta ban ong ba kala don biang ka jingïalum kynhun ki riewkiengatiar, em ngim lah ban ong kumta ne ban shu pynkut kumtei, ka bym lah long hynrei ngi la ïoh ïa ki jingtip na ki tnat syntiat shaphang ka ïaid ka ïeng, hooid ngi la ïoh. Manla ka por ba ngi ïoh, ngi pyrshang ban wad ïa kaei kaba jia bad ngi la lap ba ki don 2-3 tylli ki kynhun, kiba dei ki kynhun nonglute bad katei ka lynnong kala kut noh hi hangtei. Ki tnat syntiat ki wan manla ka sngi hynrei ban pynkut da kaba ong, ba kila ïalum biang kam long satia kaba dei,” ong u Myntri Rangbah.
U la pynthikna ba ka Sorkar ka kut jingmut ban ïai bteng ha ka ban khmih bniah bad peitngor ïa ka jinglong jingman bad ban shim ïa ki sienjam kiba donkam ban pynthikna ïa ka jingsuk bad jingshngaiñ ha ka jylla.
Ha kaba ïadei bad ka jingkren jong ka DGP, u Myntri Rangbah u la ong, “Nga tharai ka DGP ka pyrshang ban kren thik kumba ngi la ïoh ïa kitei ki jingtip bad nga tharai ba ki nongthoh khubor ha katei ka por kila shim thik tang ïa ka bynta kaba nyngkong bad kim shym la kren eiei shaphang ka jinglong jong ka dur baroh kawei. Kumta nga la ai ïa phi ïa ka dur ka dar kaba pura, ngi ïoh manla ka sngi ïa ki jingtip na ki tnat syntiat bapher bapher. Kine ki jingtip ha ki kyrdan bapher bapher ki donkam ban pynshisha bad katba ngim pat lah ban pynshisha, ngim lah ban kren pynkut ba kila sdang ban ïalum biang hynrei lada ong ba ngi ïoh pdiang ïa ki jingtip, ka dei pat kaba shisha ba ngi ïoh pdiang ïa ki jingtip manla ka sngi”.
“Mynta ka jinglong jingman ka long kaba don jingma namar ka jinglong jingman hapoh ka ri Bangladesh bad kumta kitei ki jinglong jingman ki dei kiei kiei kaba ngi hap ban bteng ban khmih bad peitngor bha. Kane ka dei ka kaei kaei kumba ka long mynta,” u la bynrap.
