Shillong, Nailar 26
Ka lympung ïalehkai Indian Super League (ISL) mynta ka aïom ka lah ban sdang biang hadien ba ka All India Football Federa-tion (AIFF) bad ka Foot-ball Sports Development Limited (FSDL) ki la pynkut ïa ka jingïalang kaba kongsan ha ka lah sngi U Blei.
“Baroh ar liang mamla ki la wanrah ïa ki mat jingïakren kiba kit jingmut bad ki la pynpaw ïa ka jingshaniah ban poi sha ka jingtyrwa kaba la mynjur lang kaba pynthikna ïa ka jingbteng biang ïa ka lympung ïalehkai phutbol ha ri India,” la pynpaw ka AIFF katkum ka kyrwoh.
“Ïa ka jingtyrwa lang yn rah hakhmat ka Supreme Court ha ka 28 tarik mynta u bnai,” la ong ka AIFF, da kaba bynrap ba ki arliang mamla kin ym kren eiei shuh namar ba kane ka kam ka dei kaba hap hapoh ka ïingbishar.
Ha kajuh ka por, ki tyllong khubor ki ïathuh ba kitei ki ar liang mamla kin sa ïakynduh biang ha kine ki sngi ban wan ban pynbeit ïa kane ka jingtyrwa ka ban sa wanrah ha ka ïingbishar. Ki la ïathuh ba ka FSDL ka la mynjur ban sdang noh ïa ka samoi ïalehkai bad ban pynïaid sa shi snem. “Katkum ka jingïateh ba kongsan ka FSDL ka hap ban siew T.25 klur sha ka AIFF haduh u Nohprah mynta u snem. Na ka bynta ka samoi ïalehkai kaba sah, ka AIFF ka kwah T.25 klur kaba ïadei bad ka jingsiew jong u snem ba la dep, hynrei ka FSDL ka dangïateh kular ban siew kaba kham duna ha ka dor T.10 lane T.15 klur,” ki la bynrap.
Ki tyllong khubor ki la ïathuh ba ka jingïakren kaba thymmai bad kaba lah ban pynlong ïa ka ISL ha u Risaw ne Naiwieng, kaba la dap ar bnai ka jingslem haba ïanujor bad u snem ba la lah. Ka Inter Kashi ka la long ka lahduh ha ka I-league kan sa ïoh ban ïalehkai nyngkong eh ha kane ka lympung ka ban don 14 tylli ki kynhun.
“Ki la don ki jingïakren ban pynlong ïa ka Super Cup shwa ban sdang ka ISL, hynrei kata ka long kum ka jingbym sdang namar ba ki hynriew tylli na ki 13 tylli ki kynhun ki dang sdang ïa ka jingtreikam jong ki mynta ka samoi. Ka jingkhmih lynti ka lah ban long 6-8 taïew shwa ka samoi ïalehkai bad bud sa ka jingsdang jong ka lympung ha u Risaw ne Naiwieng,” ki la bynrap.
Ki riew shemphang kiba la buddien halor kane ka jingjia ki la ong ruh ba ïa ka ISL lah ban ïohi ha ka rynsan kaba thymmai. “Ha u snem ba la dep ka la don ha ka Jio-Hotstar hynrei ki don ki jingïakren ban wad ïa ki nongshim kiba thymmai ban pyni ïa ka ISL na ka bynta ka samoi ban wan. Hynrei haduh mynta ym pat lah ban tip la kin don ne em ki nongthied na ka bynta kano kano ka jingtyrwa ha ka por kaba lyngkot,” ki la bynrap.
