Mawkyrwat, Nailar 26
Kawei ka kali Maruti Gypsy kaba shong da arngut ki briew, ka la phet krad hadien ba ki la ïoh sngew ïa ka jingbthei kaba sawa jam kaba syriem kum ka jingsiat suloi na kawei ka khlaw katba ki dang ïaid na ka surok Maheskhola ha khappud India bad Bangladesh, South West Khasi Hills District.
Katkum ka khubor na u Superintendent of Police ka SWKHD u Bah B Jyrwa u la ïathuh ba ha ka step jong ka 25 tarik u Nailar, 2025 ha ka por kumba 9:30 eiei, arngut ki nongshong shnong na Nongjri kiba la ïaid da ka Gypsy na ka surok lyngkot na Koraibari ban mih sha ka surok heh ban poi ha Maheskhola, kyndit kynsan kila ïoh sngew ïa ka jingbthei ba sawa jam ba syriem kum ka jingsiat suloi napoh ka khlaw hynrei kim shym la ïohi briew satia bad mar mar kila phet bak na kane ka jaka bad leit beit beit sha thanad Nonghyllam ban ïathuh ha ki pulit.
U SP u la ïathuh ruh ba ha katei ka jingjia ym shym la don ba mynsaw bad halor kane ka jingjia, ka kynhun pulit na Nonghyllam bad Borsora Check Post ki la hiar sha katei ka jaka ban khynra ban lap ksai eiei hynrei kim shym la lap dien satia.
La ïathuh ruh ba ka jingbthei kaba sawa jam ka la pynher syrngiew ïa kitei arngut naduh ka jinghiar thma ka kynhun pyntriem na Bangladesh ha kine ki khyndiat taïew ba ladep ïa ki shnong khappud bad pynlong ïa ki ban tieng bad phet na katei ka jaka.
