Jowai, Nailar 26
Ka Lumchyrmang Mihmyntdu, Tpep-Pale bad Dongmihsngi ki la khur jingjop, katba ka Youth Welfare Iooksi bad Saindur Mihmyntdu ki la ïakhaid ha ka lympung ïalehkai 2nd bad 3rd Division Football Tournament ba la pynïaid da ka West Jaiñtia District Sports Association (WJDSA) ha ka sngi Ba-ar ha Kiang Nangbah Stadium, Jowai.
Ha ka jingïalehkai Third Division Football Tournament (5th Adelbert Laloo Memorial Trophy), ka Lumchyrmang Mihmyntdu ka la pynliem noh ïa ka YS Welfare Pynthorlangtein da 2-0 kol. Ïa kine la thep da u Pynshai Biam ha ka minit kaba 36 bad u Fredy Chyrmang (57).
Ha kawei pat ka jingïalehkai kaba bud, ka Tpep-Pale ka la khyrwit haduh 6-0 kol ïa ka Lion Socio & Cultural. U Reynar Mujat (33 & 45) bad u Wansa oo Biam (38 & 41) ki la thep mar ar kol, katba ïa kiwei pat la thep da u Ebormi Bareh (49) bad u Kenny Rymbai (56).
Ha kawei pat ka jingïakhun hapdeng ka Youth Welfare Iooksi bad ka Saiñdur Mihmyntdu ki la ïakhaid mar 1-1 kol. Na ka Youth Welfare Iooksi la thep da u Lasterwell Suchiang (67) katba na ka Saiñdur Mihmyntdu la thep da u Fastermi Phawa (41).
Haba phai sha ka lympung ïalehkai 2nd Division Football Tournament (8th Debo Shullai Memorial Trophy), ka Dongmihsngi ka la pynliem noh ïa ka Shangpung Khliehmuchut da 2-1 kol.
Watla ka Shangpung Khliehmuchut ka la pynkhih jar nyngkong eh ha ka minit kaba 10 lyngba u Bantei Langstang, hynrei ka Dongmihsngi ka la pynphai kylla lyngba u Daïoshwa Siangshai ha ka minit kaba 25 bad u Benison Suchiang (69) na ka bynta ban khur syndon ïa ka jingjop.
