Khliehriat, Nailar 26
Ka kynhun Anti-Narcotics Task Force (ANTF) ki Pulit ka East Jaiñtia Hills kala kem ïa arngut ki briew bad kurup ruh ïa u drok heroin uba shongdor kumba T.60 lak eiei ha ka por ba la pynlong ïa ka Naka operation ha Umkiang kaba hap hapoh jong ka thanad Lumshnong ha ka 25 tarik u Nailar.
Ki pulit hadien ba kila ïoh jingtip ba thikna, kila pynap shrip ïa ka kali kaba wan na ka thaiñ Silchar, Assam sha Shillong, kumta kila pynap shrip ïa kane ka kali bad ïoh bat ïa ka kali ha Umkiang bad ki la kem ïa u Hajrat Umar (28 snem) na Kaliachak, Malda district, West Bengal.
Na kane ka kali, ka kynhun ki la ïoh kurup 137.86-gram u drok ba la thep ha ki 11 tylli ki synduk sabon ryngkat bad ar tylli ki mobile phone.
Hadien ki pulit kila ïoh kem sa ïa uwei u suba nongkhaïi drok, uba la tip kyrteng kum u Phulchand Ali na Lum Survey, Shillong uba la suba jur ba u don jingïadei ha ka jingkhaïi drok na kawei ka jylla sha kawei pat.
Baroh arngut la suba ba ki don bynta bad ka kynhun runar ban pynïaid ïa ka jingkhaïi drok.
Halor kane, ki pulit kila register ïa ka case ha thanad Lumshnong katkum ki kyndon aiñ jong ka NDPS, bad ka jingtohkit ka la ïaid shakhmat.
