Shillong, Nailar 26
Ki nongñiah kali kamai kiba hap hapoh ka shatri jong ka All Khasi Meghalaya Tourist Taxi Association (AKMTTA) ha ka 26 Tarik u Nailar 2025 ki la pynlong da ka jingïakhih shong kyllaiñ mungor ha khyrdop ka Assembly, Khyndailad kum ka dak ban pynsngew sha ka Sorkar Jylla halor kiba bun ki mat jingdawa bad ruh halor ka jingïakynduh jingeh ki nongñiah kali kamai tourist ka Jylla.
Ki nongñiah kali kamai tourist ki la rah ruh da ki plakad ba la thoh “Thaw noh ïa ki aiñ haba ïadei bad ki tourist”, “U khlawait mynshwa u kylla miaw mynta”, ” Ki trai ba ñiah kali kamai ki don ka hok ban dawa, namar ha la ka ri kim ïoh kamai hynrei ban shu lynga”.
Ha kane ka sngi la sakhi ba ki don haduh phew ngut ki nongñiah tourist kiba la wan ban ïakhih ha ryngkat ka jingwan ban kyrshan lang da ki nongïalam sengbhalang bapher bapher, nalor kiwei kiwei de.
Haba kren sha ki lad pathai khubor u Bah Ricaldinus Dohling President ka Association u la ong ba kane ka jingdawa mynta ka la ïaid la ar snem eiei hynrei na ka liang ki nongmihkhmat ka sorkar kim shem la pat shim kano kano ka rai.
U la ong ba ka Sorkar Jylla ka la kynnoh pynban ba ki nongñiah kali kamai tourist kidei ki ‘Gunda’.
U la ong ba na ka liang ka Association ka la ïai dawa na ka Sorkar Jylla ban thaw noh da ki aiñ haba ïadei bad ki ‘tourist’ hynrei kam shem la sngap ïa kaei ba ka Association ka dawa.
“Ngi la dawa na ka sorkar ban ailad noh ïa ki trai ri trai muluk ban kamai ne ban ïalam kai ïa ki paidbah ba wan jngohkai sha kane ka Jylla ym pat ban ailad ïa kiwei ki ba nabar ban wan kamai shapoh ka Jylla” u la ong.
Haba kylli u la ong ba ha ka jingïakren bad ki heh sorkar ha ki por ba ka Association ka leit ïakynduh ka shu kut tang ban ïa dih sha hynrei ka kam pat kam poi shaei shaei.
U Bah Ricaldinus u la byrngem ruh da kaba tyngeh ba ka sorkar kadei ban khot noh da ka jingïalang hapoh ka shitaïew bad lada kim khot ïa ka jingïalang kin sa mih paidbah ban pynlong da ki jingïakhih kiba kham jur shuh shuh.
