Namar ki jingjia aksiden ba khah khah, lum jingïalang u MLA ïa ki tnat Sorkar

U MLA ka Jowai u Ma Wailadmiki Shylla ha ka 26 tarik Nailar u la lum da ka jingïalang bad ki tnat treikam Sorkar bapher bapher ban ïathir jingmut halor ki lad ki lynti ban...

Jowai, Nailar 26

U MLA ka Jowai u Ma Wailadmiki Shylla ha ka 26 tarik Nailar u la lum da ka jingïalang bad ki tnat treikam Sorkar bapher bapher ban ïathir jingmut halor ki lad ki lynti ban ïaleh ban pynduna ïa ki jingjia aksiden ha surok bah kaba wanrah ym tang ïa ka jingjot jingpra ki kali, hynrei kaba kham pang nud eh ka long ka jingduh ei noh ki mynsiem briew.

Kane ka jingïalang ka long hadien ka jingjia aksiden kaba la jia ha ka step 21 tarik mynta u bnai hajan surokbah NH-06 hajan ka pung Thadlaskeiñ, West Jaiñtia Hills District kaba la wanrah ka jingduh noh ïa ki ar ki mynsiem briew kynthup u khunlung ba dang 2 snem bad uwei u samla hadien ba ka trok kaba kit clinker kala ban ïa ka Maruti Eeco haduh ba kan julor phom.

Ïa ka jingïalang la pynlong ha Hall ka Highwinds Lake Side ha ka jingwan ïashim bynta da ka tnat DTO, ki Pulit (Traffic), ka tnat ka koit ka khiah bad ka tnat PWD, nalor ki nongïalam bad dkhot nongkitkam jong ka Dorbar Mukhla Pyllun.

Ha ka jingïalang la ïakren ïa ki lad ki lynti ban ïaleh ban pynduna ïa ki aksiden, kata da kaba buh ïa ki speed breaker, ki dak jingkdew ki ban ai jingtip ïa ki nongñiah ban long kiba husiar khamtam ha ki jaka kiba long kham ma ïa ka leit ka wan jong ki kali motor bad ban pynbiang ïa ki jaka ïaid kjat paidbah (Footpath).

U MLA ha ka jingïalang u la ban jur halor ka jingdonkam ban ïatreilang ki tnat bapher bapher ban thaw ki lad ki lynti ban shngaiñ ka ïaid ka ïeng ki paidbah lyngba ka surokbah khamtam ki khynnah skul.

Hadien ka jingïalang, u MLA ryngkat ki heh ophisar ka PWD bad pulit la pynlong ka jingjurip ïa ki ar jaka kiba kham buh jingma, kata ha Lad Mukhla bad ha Mookyndur ka jaka ba khun bha bad kaba la ju wanrah ka jingjia hap kali na ka por sha ka por.

Haba kren sha ki lad pathai khubor u Ma Wailadmiki Shylla u la ong, hadien ka jingjia aksiden kaba la jia ha Lad Mukhla kala pynlong ïa u ban sngewkhia haduh katta katta namar wat ki briew kiba ïaid lynti ruh kim shngaiñ shuh.

Kumba long mynta, wat ki paidbah ruh kim nud shuh ban ïaid lyngba katei ka jaka namar ba khim ka jaka bad ka jingbym don ki dak ‘signage’ ban ïarap ïa ki nongleit nongwan, la pyntip u Ma Wailadmiki bad bynrap ba dei halor kane kaba la pynlong ïa u ban lum jingïalang bad ki tnat bapher bapher khnang ban wad ki lad ki lynti bad ban pynshna ïa ki jaka ïaid kjat na ka bynta ki paidbah bad ki khynnah skul.

U la pyntip ba ïa ka surok NH-6 la peit bad khmih da ka National Highway Authority of India (NHAI) katba ka Road and Safety ka dei tang ka nongkdew dak ha ki bynta ba don jingma jong ka surok katba ka jingïarap kan wan na ka Ministry.

U Ma Wailadmiki u la pyntip ba un rah ïa kane ka mat sha ka Sorkar Jylla ban don la ka jong ka Fund khlem da ap na kiwei namar ka dei ka mat jong ka jingim bad ka jingïap jong ki nongleit nongwan.