Japan, Nailar:
Ki heh jong ka aiñ jong ka Japan ki la panmap na ka longïing jong uwei u nongkhaïi uba la shah kem bakla bad uba la khlad noh hadien ba la set patok ia u da ki bnai.
U Shizuo Aishima, uba dei u nongai jingmut barim jong ka kompeni shna machine Ohkawara Kakohki, u dei uwei na ki 3 ngut ki nongpyniaid jong ka kompeni, kiba la shah set be-aiñ ha ka jingshah set patok ha shwa ban bishar, da ki bnai, halor ki jingkynnoh, kiba la weng noh hadien.
Ki nongïakhih ïa ka hok longbriew- manbriew ki la dawa naduh mynshwa ban pynkut noh ïa ka rukom “bishar hok ïa ki nongshah rahbor” jong ka Japan, ha kaba ki nongtohkit ki pyndonkam ïa ki kyndon set patok ba jrong bha, shwa ban bishar ban pynbor ïa ki ban phla ia ki jingleh kam runar jongki.
Ki heh ophisar na ki pulit jong ka nongbah Tokyo, ka tnat jong u nongmudui paidbah ba ha khlieh duh bad ka ophis jong u nongmudui jong ka Tokyo, ki la leit jngoh ia ka ïing- ka sem bad ka jingtep jong u Aishima ha ka Sngi Nyngkong, ban pynpaw ia ka jingsngewlem halor ka jingshah pharep be-aiñ bad ka jingshah kem jong u haduh ba un da khlad noh syndon ha ka kti jong ki pulit, khlem da ioh ia ka hok jong u.
“Ngi panmap naduh ka dohnud namar ba ngi la pynlong ïa ka jingtohkit bad jingkem be-aiñ,” ong u Tetsuro Kamata, uba dei u Deputy Superintendent-General jong ki pulit ka tnat Tokyo Metropolitan Police ha ka jingïakynduh bad kiba haïing- hasem jong utei u briew ha katei ka sngi.
Na ka liang jong ka kurim utei u briew, ka la ong, “Nga pdiang ia ka jingpanmap, hynrei ngan ym lah ban map.”
Namar la ong ba ki pulit ki la kem ia 3 ngut ki briew ba la suba don kti ha ki kam pynkheiñ aiñ ha u Lber jong u snem 2020 halor ka jingkynnoh ba ki don kti ha ka jingshalan be-aiñ ïa ki ki katto- katne ki tiar shabar ri.
La lap ba u Aishima u don ïa ka jingpang bampong kaba la nang ktah ia ka jinglong- jingman jong ka met jong u ha u bnai Lber jong utei hi u snem 2020, hynrei ki nongmudui ki la set ïa u, da kaba kynthoh ba u lah ban pynjot ïa ki sakhi lada pyllait noh ïa u. hadien kata, la pynthiah ia u ha hospital hadien shibnai ba la kem
noh ia u.
Ki arngut ki paralok jong u pat, ki la ioh mih noh na patok ha u Rymphang jong u snem 2021 uba bud, da kaba buh kyndon ba kin nym ïakynduh ïa u Aishima, kaba la khanglad ïa ki ban ïohi ïa u, shwa ba un khlad noh ha utei u juh u bnai.
Ki nongmudui hadien kata, ki la weng noh ïa katei ka jingshah kynnoh, kaba la pynlong ïa kiba haïing- hasem bad ki paralok jong u Aishima ban mudui da ka ejahar pyrshah ïa ki bor synshar kiba la pynbud nam ia u bad kiba la set along ia u haduh ki sngi ba khatduh jong ka jingim jong u.
Ka Tokyo High Court ka la lap ba ka jingtohkit, ka jingkem bad ka jingmudui ka long kaba be-aiñ, namar ym shym la don sabut khyndiat ruh ban lap ia ka jingiadon kti jong utei u briew haba iadei bad katei ka kam ba la pharep pyrshah ia u.
