Shillong, Nailar 26
Ka Kynhun Myntri ka Sorkar Jylla kala pdiang ïa ka kaiphod jong ka Meghalaya Public Service Commission Reforms Committee (MPSCRC), kaba thmu ban kyntiew ïa ka rukom treikam, ka jingmih bad ka jinglong khuid jong ka rukom thungkam ha ka Meghalaya Public Service Commission (MPSC).
Ïa kane ka kaiphod la aiti da ka komiti kaba la khlieh da u Principal Secretary, u Bah FR Kharkongor.
“Ka komiti ka la aiti ïa ka kaiphod jong ka bad ngi la pdiang ïa ka kaiphod baroh ha ka jingïalang ka kynhun Myntri mynta ka sngi,” la ong u Myntri Rangbah ka Jylla, u Conrad K Sangma sha ki nongthoh khubor hadien ba la wai ka jingïalang ha ka sngi Ba-ar.
U Myntri Rangbah u la pyntip ba ka kynhun Myntri ka la ai jingmut ban buh ïa ki CCTV bad ki tiar shondur ha ka por ba pynlong ïa ka interview ban pynthikna ïa ka jingkhuid bad ka jingkitkhlieh.
“Nalor (ki jingai jingmut jong ka komiti), ka kynhun Myntri ka la ai jingmut ba dei ban don ki CCTV bad ka jingring dur kaba biang ha ka por ba pynlong ïa ka jingïakren (interview) bad ki camera ki dei ban don hangta khnang ba lada don kano kano ka jait jingkylli ne kano kano ka jingeh kaba mih lah ban pynphai sha kita,” u la ong; katba u pynthikna ba shen yn sa pynpaw paidbah ïa ka kaiphod khnang ba ka jingtreikam bad ka jinglong khuid ha ka rukom thungkam kan long kaba shai.
Haba pynpaw ïa ki jingpynkylla ba kongsan, u Myntri Rangbah u la ong ba ki don ki lad ki lynti kiba lyngkot bad ki lad ki lynti ba pdeng bad kiba jrong ba la ai jingmut da ka komiti.
Ki lad ki lynti kiba lyngkot ki kynthup ïa ki lad ban don bun tylli ki board na ka bynta ka jingïakren (interview) kaba kham stet, ban buh ïa ki kyndon ïakren, ka jingpynbna ïa ki mar ki mata bad ki jingkitkhlieh da u Chairman bad ki dkhot, ka jingthaw ïa ka cell jong ki jingujor, ka jingpynpaw paidbah ïa ki marks ba la ïoh da ki kyrtong, ka jingpyllait ïa ki jubab hadien ka eksamin bad kiwei kiwei.
“Ka por ba kyrpang ban ai na ka bynta ban ïaleh ïa ki jubab bad ban weng ïa kino kino ki jingujor kiba ïadei bad ka jingbamsap bad ka jingpeitngor ha ka MPSC lyngba ka Meghalaya Lokayukta Act, 2014,” ong u Myntri Rangbah haba pynskhem ba ym shah ban pynkylla ha ka rukom thung kam shisien ba la sdang ïa ka kam.
Ha kaba ïadei bad ki sienjam ba pdeng bad ba jrong, u Myntri Rangbah u la ong ba ka komiti ka la ai jingmut ban leh ïa ki test da ka kompiwtor (computer-based test) ban pynkhlaiñ ïa ki cell jong ka MPSC ha Jowai ne ha Tura, ka eksamin ba la pynïasoh lang (combined competitive examination) bad ban sangeh noh ïa ki optional paper.
“…ki eksamin ba la pynïasoh lang, kaba mut ba ïa ka eksamin naka bynta kajuh ka kyrdan bad kajuh ka scale lah ban pynïasoh lang khnang ban lait na kano kano ka jait jingpynkylla ne jingpynslem. Ha kaba ïadei bad ka jingpynsangeh ïa ka sobjek ba la jied (optional paper), ngi la dep ban leh ha ka sien kaba la dep na ka bynta ka eksamin Meghalaya Civil Services (MCS) bad ngin sa leh naka bynta kiwei ki eksamin ruh ha ki sngi ban wan”, pynbna u Myntri Rangbah.
