Hanoi, Nailar:
Ka Vietnam, ka la pynkynriah ïa ki spah hajar ngut ki nongshong shnong bad la khang ruh ïa ki skul bad ki Kad Liengsuiñ katba ka dang pynkhreh ïa ka jingleit ïaid lynti jong ka ‘eriong ‘Kajiki’, ka ban long ruh ka ‘eriong kaba jur tam ba katei ka ri kan ioh mad ha une u snem.
Ki tnat ba dei khmih ia ka suiñ bneng bad ka jinglong- jingman jong ka mariang, ki la iathuh lypa ba katei ka ‘eriong, ka don ia ka lyer, kaba jur haduh 166 kilometre (103 mile) ha ka shi kynta, ha ka por 10 baje mynstep jong ka Sngi Nyngkong. Hynrei la khmih lynti, ba kan kham tlot khyndiat ha shwa ba kan hiar sha khyndew hapdeng ka Thanh Hoa bad Ha Tinh jong ka phang pdeng ka Vietnam.
Kane ka ‘eriong ka la sdang wanrah shwa da ka lyer kaba kham jem naduh ka 22 tarik u Nailar hynrei ka la nang khlaiñ bad nang kylla dur sha ka eriong kaba khlaiñ bha tang hapoh jong kine ki ar sngi ba la dep, kaba la iasyriem bad ka ‘eriong ‘Yagi’ jong u snem ba la dep, kaba kane ka ri ka la sakhi kum kawei na ki ‘eriong kaba jur tam ha katei ka thaiñ. Kumta la ong ba kane ka jingkhlaiñ bor jong katei ka ‘eriong, ka la pynlong ia ki bor synshar jong ka Vietnam ban shim kyrkieh ia ki lad ki lynti namar ba ka lyer kaba jur bad u slap uba jur ki la ktah ia katei ka thaiñ baroh kawei.
Ha u snem ba ladep, ka ‘eriong ‘Yagi’, ka la shim ia kumba 300 ngut ki mynsiem briew bad ka jingjulor jong ki iing- ki sem bad ki jingtei bapher ha katei ka nongbah, ka la poi sha ka $3.3 billion baroh.
Ka ‘eriong ‘Kajiki’, ka la dep ban wanrah ia ka jingjulor ha China, ha kaba ka lyer kaba jur bad u slap uba jur, ki la lynshop ia ka Hainan Island bad ki bynta ba marjan jong ka thaiñ Guangdong, ha ka Sngi U Blei. Hynrei ki bor pyniaid ki la iathuh ba kumba 20,000 ngut ki paidbah nongshong shnong na kitei ki thaiñ ba marjan, la ioh ban pynkynriah noh sha ki jaka ba kham shngaiñ.
Uwei u briew ha ka nongbah Nghe An, u la duh noh ia la ka jingim ha ka Sngi Thohdieng hadien ba u la shah lympat ha ka bording katba u dang pyrshang ban pynskhem ia ka tnum jong u ha ka por ba katei ka ‘eriong ka la leit lynshop ia katei ka thaiñ ha katei ka sngi.
La antad ba katei ka eriong, kan iaid sha Laos bad sha ka phang ba Shatei Lam Mihngi jong ka Thailand.
Ki lad pathai khubor jong ka sorkar Vietnam, ki pynbna ruh ia ka jingthmu ban pynkynriah ia kumba 600,000 ngut ki paidbah nongshong shnong na Thanh Hoa, Quang Tri, Hue bad na Danang, ha kaba palat 1,52,000 tylli ki ïing, ki don ha ki jaka ba ap jingma na katei ka ‘eriong.
Ka sorkar ka la ong ba palat 16,500 ngut ki shipai bad 107,000 ngut ki shipai la pynkynriah ban iarap ha kaba pynkynriah ia ki briew bad ki dang pynkhreh ban wad bad pyllait im.
Nalor kane, ka Vietnam ha ka Sngi Nyngkong ka la pynsangeh treikam noh ïa baroh ki liengsuiñ jongka, ha ki ar tylli ki Kad Liengsuiñ, kiba don ha ki nongbah Thanh Hoa bad Quang Binh, la pyntip ka tnat Civil Aviation Authority jong ka Vietnam, hadien ba, da ki phew tylli ki liengsuiñ ki la shah pynsangeh noh.
Ki stad saïan ki la pynmih ïa ka jingwad bniah ha u snem ba la dep kaba maham ba ki duriaw kiba la shah thang ha ka jingshit ka sngi, ki lah ban kiew ka jingkhluit bad kin wanrah ruh ïa ki eriong ba jur ha ki thaiñ Shatei Lam Mihngi jong ka Asia.
