Shillong, Nailar 26
Ha ka 26 tarik u Nailar 2025 ki nongïalam ka Hynñiewtrep Youth Council (HYC) ki la shah khot hajir ha Ïing Kashari halor ka jingkynnoh ba ki leit ban tan jubor ïa u Director ka NEIGRHIMS u Dr.Nalin Mehta kaba la jia ha ka 04 tarik u Ïaïong 2025.
Ki nongïalam ka Hynñiewtrep Youth Council (HYC) kiba la shah khot hajir ki kynthup ïa u President ba rangbah ka seng u Bah Roykupar Synrem, Bah Donbok Kharlyngdoh, Vice President, Bah Rhembor G Saibon, General Secretary, Bah Isaac Basawïamoit, Secretary, Education Secretary Bah Enlang Sawian. Ha kane ka sngi la sakhi ruh ïa ka jingwan ban synran lang da ki dkhot ka seng.
Ka jingshah khot hajir ki nongïalam ka seng hakhmat ka Ïing Kashari kadei hadien ba ki bor pulit ki la dep tohkit bad Charge Sheet halor ka jingjia kaba la jia ha ka 04 tarik u Ïaïong ha NEIGRHIMS.
Haba kren sha ki lad pathai khubor u Bah Roykupar Synrem President u la ong ba ka seng ka leit sha NEIGRHIMS, da ka jingthmu ban pan jingshai na u Director halor ki mat jingdawa ba ka seng ka la buh hakhmat na ka bynta ka bha ka miat ki khun samla trai ri trai muluk.
U la ong ba ha kato ka sngi ka seng ka la khot ïa u Director ban ïakren haba shit haba shai ym ban kren hapoh ka ophis treikam jong u bad ki la khot ïa u ba un mih shabar ban pynshai hakhmat ki dkhot jong ka seng kiba la donlang ban kyrshan ïa ka seng ha kato ka sngi.
“Hadien ba ngi la khot ïa u ban mih shabar , u Director ruh u la mih da la ka mon sngewbha jong u hynrei ngim shym la tan jubor ïa u ban mih shabar ” la ong u Bah Roykupar Synrem.
U la ïathuh ba hadien kata na ka liang u Director u la mih shabar bad u la pyntip ba un sa ai ïa ka jubab ha kato ka sngi hi bad hadien ba ki la ïoh ïa kata ka shithi jubab, ki nongïalam ka seng ki la rung biang hapoh ka ophis jong u ban ïakren, bad kata ka jingïakren ka la kut da ka jingïasngewthuh jingmut.
Shuh shuh u la ong “Kaba sngewsih ka long ba hadien ba ki la mih na NEIGRIHMS ka la don ka jingujor pyrshah ïa ki 5 ngut ki nongïalam ka seng”.
U Bah Roykupar Synrem u la ong ba ka jingwan hakhmat ka Ïing Kashari kadei hadien ba ki pulit ki la dep ban tohkit bad Charge Sheet, da kaba bynrap ba ka jingsted treikam ki pulit ka pynlyngngoh namar ka jingjia ka jia ha u bnai Ïaïong hynrei tang u bnai Jylliew pat la dep ban tohkit.
U la ong ba ka Ïing Kashari kan sa bishar ïa ki bad pynpaw ba lada ka Ïing Kashari ka khot bishar ïa ki na ka liang jong ki ruh kin sa leit ban ïashim bynta ha kata ka jingbishar na ka bynta kaba bha.
