Shillong, Nailar 26
Ka Mawkriah West SC ka la long sa kawei pat ka kynhun kaba la lah ban pynthikna na ka bynta ban rung sha ka final ha ka SRGT 3rd Division Football League 2025 ba la pynïaid da ka Shillong Sports Association (SSA), hadien ba ka la lah ban pynliem noh ïa ka Madan S&CC lyngba ka tie-breaker da 4-3 kol ha ka sngi Ba-ar.
Ha kane ka jingïakhun semi final kaba ar, baroh ar ki kynhun ki la long kiba ïabiang bor bha ha ka rukom ïalehkai kat haduh ba ki la ïakhaid mar 2-2 kol ha kaba kut ka jingïalehkai. Watla na ka liang ki bor pynïaid ki la ailad ba kin ïakhun sa ïa ka ‘extra time’ hynrei kine ki kynhun ki la ïakhaid mar 2-2 kol.
Te kumta dei lyngba ka jingïashut ïa ka tie-breaker ba ka Mawkriah West ka la tam da 4-3 kol ïa ka Madan bad ka la khur syndon ïa ka jingjop.
Lyngba kane ka jingjop, ka Mawkriah West kan pynkhreh ban ïaknieh ïa ka nam lahduh pyrshah ïa ka Umlyngka SC ïa kaba yn sa pynlong shen.
Ka Umlyngka ka dei ka kynhun kaba la lah ban pynliem ïa ka Umrynjah SC lyngba ka tie-breaker da 4-3 kol ha ka semi final kaba nyngkong myn ha ka lah sngi U Blei.
Te kumta ka Mawkriah West bad ka Umlyngka ka la ïoh rung sha ka Second Division bad kin ïoh ban ïalehkai naduh u snem ban wan.
