Washington, Nailar:
U President ka US- u Donald Trump ha kane ka sien, u la maham tyngeh ia ki nongialam jong ka Russia bad Ukraine, u Putin bad u Zelensky, lada kim lah ban iapynbeit noh kloi ia ka jingiakynad, ka US kan pynshitom ia kitei ki ri, da ki kyndon kiba kham eh bad kham jur shuh- shuh kumba u la dep byrngem baroh shi katta.
Haba la kylli ia u, hato kan don ka jingma lada ki arngut ki nongïalam kim treh ban ïakynduh bad b an ia pynbeit, u Trump u la ong, “Kan don ka jingma kaba khraw. Kane ka thma kan ym shym la jia satia lada nga long u President naduh kito ki por shuwa ban sdang ka thma Russia. Ngin sa peit kaei ka ban jia ha ka shi taiew ne ar taiew ban wan, bad ha kata ka por ngan pyni da kaba tyngeh bha…”
Ka jingmaham ba khatduh jong u ka long hadien ki jingkren ba la kren ha ka taiew ba la dep, ha kaba, u Trump u la ong ba un shim ïa ka “rai kaba paka bha” ha kine ki ar taiew ban wan halor ka thma Russia-Ukraine, kaba pynpaw ïa ka jinglah ban pynjari ïa ki “jingpynjari lane ki khajna kiba heh” ïa ka Russia bad kumjuh ruh ia ka Ukraine lada kim lah ban iabeit noh ha ka por ba la ai por.
U Trump u la ong ba ka rai jong u, ka shong ha kaei ka ban jia ha kine ki ar taiew ban wan bad u la pynbor ia ka jingiakynduh hapdeng u President ka Russia, u Vladimir Putin bad u paralok jong u na Ukraine, u Volodymyr Zelenskyy.
Haba kren sha ki nongthoh khubor ha Oval Office, u Donald Trump u la ong, “Hadien ar taiew, ngin sa tip sha kano ka lynti ngan leit namar ngan leit sha kawei ka lynti ne kawei pat. Kan long ka rai kaba kongsan bha. Ngan sa rai la ka dei ban buh khajna kaba heh ne kam dei ban leh kumta ia ki mar khaïi jongki, hynrei un bishar da ka hok.”
Haba kylli shaphang kawei ka karkhana jong ka US kaba la iathuh ba ka la shah thombor ha Ukraine ha ka por ba dang shen, kaba ka Russia ka la leit thombor da ki ‘namding, u Donald Trump u la ong, “Ngam sngewbha halor kane bad ngam sngewtynnat ia kaei- kaei ruh haba iadei bad kane ka thma. Nga la dep pyniasuk ia ki hynñiew tylli ki thma bad ngan pynbeit ia baroh ki kynrum- kynram kumba nga la kular.”
Kham mynshwa, u Myntri kam bar ri jong ka Russia, u Sergey Lavrov, u la ong ba u Vladimir Putin u long ba la kloi ban ia kynduh ia u President ka Ukraine, u Volodymyr Zelensky, lada baroh ki mat kiba iadei bad ka jingpynbeit ia ka jingiakynad hapdeng ka Russia bad ka Ukraine ki dei kiba la trei bniah bha.
U Lavrov u la ïathuh ha ka RT ha ka sngi Thohdieng, “U president jong ka Russia u la ong bunsien ba u kloi ban ïakynduh, kynthup ïa u Zelensky, lada ka don ka jingïasngewthuh jingmut ba baroh ki mat kiba donkam ban pyrkhat ha ka kyrdan ba ha khlieh duh la ïatrei bniah bha” da ki riew shemphang bad ki myntri.
