Duh jingmyntoi kumba 40 tylli ki shnong naduh ba khang ka Balat Border haat

Shillong, Nailar 27

Ki don kumba 40 tylli ki shnong kiba la duh jingmyntoi naduh ba la khang ïa ka Balat Border haat kaba don ha khappud Bangladesh kaba dang hap hapoh ka Hima Bhowal, Mawsynram Block kaba la ïaid mynta la shisnem tam.

Ka jingkhang ïa ka Balat border haat ka dei naduh ba ka don ka jingïakhih kaba jur ha Bangladesh, kane ka la bteng ban khang ïa kane ka border haat ka la pynhiar ïa ka ïoh ka kot ïa ki nongshong shnong kiba sah ha ki thaiñ khappud.

Na ka liang u Paiem Kynsai Syiem, Syiem ka Hima Bhowal u la ong ba ha kine ki ar snem na ka liang ki nongshong shnong kiba sah sha khappud bad ki khun ki hajar ka Hima Bhowal ki la ïatreilang bad ka Sorkar ban sangeh shwa ban leit ïew border haat namar ba ka dang khang hynrei haduh mynta kam pat plie bad ka la pynhiar ïa ka ïoh ka kot bad ka long ka jingduhnong kaba khraw.

“Kumba 30 ne 40 tylli ki shnong kiba ïoh jingmyntoi na kane ka border haat hynrei mynta ka la hiar bha namar baroh ki mar rep baroh ki ïaid bha sha Bangladesh,” u la ong.

Shuh shuh u la ong ba hadien ba ka jinglong jingman ka la kham jai jai sha Bangladesh, na ka liang Hima Bhowal ka la phah jingthoh sha ka Sorkar Jylla bad Sorkar Bangladesh ba kan plie biang ïa ka border haat hynrei na ka liang ka Sorkar Bangladesh kam pat lah ban plie ïa kane ka border haat.

Kumta u Paiem u kyrmen ba ka Sorkar kan shimkhia ïa kane bad sa shisien ka border haat kan plie biang bad kan long ka jingkyrkhu ïa ki paidbah.