Mawkyrwat, Nailar 27
Ka FKJGP South East Khasi Border Circle haba pynpaw ïa ka jingsngewkhia ka la leit ban jurip ïa ka jinglong jingman jong ka surok na Weiloi Balat haduh jingkieng Umpung bad lap ïa ka jingsniew palat ka surok bad ka jingïoh ïaid mon ki trok kit coke kiba ïaid bad miet bad sngi kaba la ktah ïa ka ïaid ka ïeng u paidbah.
Halor kane ka bynta ka seng hapoh ka jingïalam u President Samla Kyrmen Shangdiar ka leit ban pynsngew sha u Block Development Officer (BDO) Mawsynram C&RD Block ban shimkhia halor katei ka jingeh ba u paidbah u ïakynduh ha ka leit ka wan.
U samla Kyrmen lyngba ka kyrwoh khubor u la ïathuh ba na ka liang ka seng ha ki snem bala dep ha u bnai Naitung ka la leit ban pynsngew ha u Deputy Commissioner ka East Khasi Hills bad mynta sa shisien ka leit ban pynsngew ïa kijuh ki mat ha u BDO ka Mawsynram.
U la ïathuh ruh ba man ki por ka don ka jingkylla ki trok kit coke ha kane ka surok bad dang ha kine ki khyndiat sngi ka don kawei ka trok kaba kylla bad wanrah ïa ka jingdheng kali.
U la ong ruh ba kum ka seng kam lah ban shu sngap, kumta ka buh ruh ka jingdawa ïa ki trok kit coke ba ki dei ban ïaid noh da ka por kata tang 10 tylli kiba hiar bad 10 tylli kiba kiew ha ka shi sngi bad ka seng ka maham ruh ba ym dei ban kit palat pud ïa ka 9 ton kumba ka tnat PWD Mawsynram Division ka la buh lyngba ki signboard. U la ong ruh ba ka seng kam lah ban len ba na ka liang ka PWD ka la leh shitom ban maramot ïa ki jingkieng bad ker kynroh ïa ki jaka kiba la synjor hynrei kam lah ban pynbiang namar ka jingbym lah ban tehlakam ïa ka jingïaid palat pud ki trok ha kaba ki surok ki la thliew bad kylla pung bad bun ki jaka ki la ngam.
Kumta ka seng ka kyntu ruh ba dei ban peit bha ha ki Weight Bridge kum ki check gate khnang ba ki trok kin nym lah ban kit palat pud khnang ba nym pynthut ïa ka leit ka wan jong u paidbah.
