Shillong, Nailar 27
U Bah Process T Sawkmie, MLA barim u la ong ba kane ka dei ka sien kaba nyngkong naduh ba ïoh la ka jong ka jylla ba ka Sorkar ka nud ban shim ïa ka rai ban pynsiew tulop noh ïa ki nongtrei jong ki lai tylli ki Autonomous Districts Council (ADC), kata ka KHADC, JHADC bad GHADC.
“Kum ki paidbah ngi la dei ban ai jingïaroh ïa ka Sorkar u Conrad Sangma bad ka kynhun Myntri baroh kawei kiba la shim ïa kane ka rai namar man ka por ngi la ïohi ba ki nongtrei District Council ki hap ban pynlong ki jingïakhih ban dawa ïa la ka tulop,” ong u Bah Process.
U la ong ruh, “Ka Sorkar Jylla kum ka kmie ka don ka jingkitkhlieh haba ka ïohi na ka por sha ka por ba ki nongtrei ki hap ban ïakhih ban ïoh tulop, hynrei kaba sngewtynnad pat ba ka rai jong ka Sorkar ka long ba ka shong ha ki ADC la ki pdiang ne kim pdiang ïa kane.”
“Ki paidbah ki kwah watla ka Sorkar ka la ïarap ban pynsiew ïa ka tulop, hynrei kam dei pat ban mushlia ïa ka jingtreikam ka council kumba la pynkup bor da ka riti synshar ka ri India. Ngi nang dei ban pynkhlaiñ shuh shuh namar kane ka dei ka stieh jong ka jaidbynriew jong ngi,” bynrap u Bah Process.
