Shillong, Nailar 27
Ka Hynñiewtrep Integrated Territorial Organisation (HITO) Bhoirymbong Circle ha ka 27 tarik Nailar, 2025, ka la phah da ka jingthoh sha ka Myntri ba dei khmih ïa ka tnat ka koit ka khiah ka Sorkar Jylla, ka Kong Ampareen Lyngdoh halor ka jingbym don ka jaka bret ñiut ne theh ñiut jong ki nongpang kiba phah sumar ha Ayush Hospital kaba don ha Bhoirymbong ha kaba na ka liang ki nongtrei jong katei ka jaka sumar ki ju phah rah biang ïa ki jaboh jong ki nongpang na hospital bad ban leit bret sha la ïing.
Ka seng ka la pynpaw ka jingsngewkmen shikatdei eh ïa ka jingdon jong kane ka jaka ai jingsumar kaba long ka jingkyrkhu bad ka jingai jingmyntoi shibun eh ïa ki paidbah nongshong shnong jong ka dong bad ka thaiñ hi baroh kawei.
Hynrei na ka liang ka seng ka la ïoh pdiang pat ïa ki jingud jingnam na ki nongpang kiba leit phah sumar ha katei ka hospital namar naduh ba la plie ïa katei ka jaka ai jingsumar bad kat haduh mynta, kam pat don ïa ka jaka pyllang ñiut ne theh ñiut.
Shuh-shuh, ka seng kala ong ba ka jingbym don ka jaka theh ñiut lane ka jaka pyllang ñiut ha katei ka jaka sumar, ki nongtrei jong katei ka hospital ki hap ban phah kit lane phah rah ïa ki jaboh jong ki nongpang sha ïing bad sha la ki shnong jong ki ban bret bad ong ba kane ka jinghap ban rah ïa ki jaboh sha ïing, ka lah ban wanrah ïa ka jingsaphriang jong ki jingpang bapher-bapher.
Da kaba kyrpad ruh ïa ka Sorkar bad ka Myntri ba kan shimkhia lem haba ïadei bad kane ka bynta khnang ba kan nym don kano kano ka jingktah ïa ki paidbah bad kumjuh ïa ka thaiñ hi baroh kawei.
“Kane ka wanrah ka jingma namar kine ki jaboh ki lah ruh ban wanrah ïa ka jingsaphriang jong ki jingpang bapher bapher. Kumta, kum ka seng ngim lah ban pdiang bad ngi dawa na ki bor Sorkar ba kin buh lane shna mardor ïa ka jaka pyllang jaboh ha katei ka hospital”, ong ka seng.
