Aizawl, Nailar:
Ki pulit ka Mizoram, ki thmu ban sdang ïa ka jingïakhun kaba jur pyrshah ïa u drok bad ka jingdih buaid, ha ka jingïatreilang bad ka tnad Excise bad ka seng bhalang kaba heh tam jong ka jylla, ka Young Mizo Association (YMA), la pynbna u Myntri ka tnat ki kam pohïing u K Sapdanga ha ka 26 tarik u Nailar.
Haba plie ïa ka prokram ai jinghikai tynrai na ka bynta ki 280 ngut ki pulit langrut ba dang shu shah thung thymmai ha ka Police Training School (PTS) ha Thenzawl ha Serchhip distrik, u Sapdanga u la ong ba ki nongkhaïi drok bad ki nongdih drok ki leh ïa ki kam tuh bad kiwei kiwei ki kam sniew, kaba buh jingma ïa ka imlang-sahlang, kaba dawa ïa ka jingdonkam ban ïakhun pyrshah ïa ki.
U la ong ba ka sorkar jylla ruh ka la pyrshang shibun ban khanglad ïa ka jingshalan beaiñ ïa ki kwai tyrkhong na Myanmar bad ka la sangeh noh ïa ka jingshim kuna beaiñ na ki nongleit nongwan da ki pulit ha ki khyrdop talasi ha ki khappud hapdeng ki jylla. Ha kane ka sngi la ïadonlang u Myntri ka tnat Supply u B Lalchhanzova bad u DGP jong ka Mizoram u Sharad Agarwal.
Ha kane ka jinghikai kaba khyndai bnai, ki nongshah hikai na baroh 11 tylli ki distrik jong ka jylla kin ïaid lyngba ka jinghikai kaba ïahap bha hapoh bad shabar kaba pynleit jingmut ha ka jingkoit jingkhiah ha ka met, ka jingnang jingstad ha ka kam, ka akor ka burom, bad ka jingpynroi ïa ka jinglong, ong ka kyrwoh khubor ba la wan na ki pulit.
Ka Syllabus ba la pynkylla ka pynrung ïa ki aiñ pynshitom beiñ kiba thymmai da kaba pynleit jingmut bha ha ki kam runar kiba mih lyngba ki Cyber, ka jingwad bniah, ka hok longbriew manbriew bad ka jingtreikam jong ki pulit ha ka imlang sahlang, la ong ka khubor.
Ka jingthmu jong kane ka jingai jinghikai ka long ban pynleit jingmut ha kaba pynkhreh ïa ki nongtrei thymmai na ka bynta ka kam pulit kaba don ka jingsngewrit, kaba ïadei bad ka imlang sahlang da kaba pynleit jingmut ha kaba ai ïa ki jingshakri kiba aiti, kiba hok bad ki bym don jingïapher sha ki nongshong shnong, la ong ka khubor.
Ka bynta kaba kongsan kan long halor ka jingai jingmut ïa ka jingïeid ïa ka jingkoit jingkhiah ha ka met jong ki nongtrei khnang ban pynthikna ba kin don ïa ka jingmut kaba shai, ka jinglah ban shim rai kaba bha, ka mynsiem ïatreilang kaba khlaiñ bad ka jingïatreilang, ong ka kyrwoh.
