Jowai, Nailar 27
Ka Catholic Youth Mihmyntdu, Mookymphad, Riatsaliya Mihmyntdu bad Moosalyngkat ki la khur jingjop ha ka 3rd Division bad 2nd Division Football Tournament ba la pynïaid da ka West Jaiñtia District Sports Association (WJDSA).
Ha ka jingïalehkai 3rd Division kaba la long ha ka sngi Balang ha Kiang Nangbah Stadium, Jowai, ka Catholic Youth Mihmyntdu ka la pynliem noh ïa ka Loompyrdi Ïongpiah lyngba ka shi kol ba la thep da u Heimonmi Dkhar ha ka minit ba 20.
Ha ka jingïalehkai kaba bud, ka Mookymphad ka la jop da 3-0 kol ïa ka Umshangyiar. Ïa kine ki kol la thep da u Honesty Phawa (32), Jerry Dkhar (46) bad Wailad Shylla (65).
Ha kawei pat ka jingïalehkai, ka Riatsaliya Mihmyntdu ka la pynrem noh ïa ka M. Nangbah da 4-0 kol. U Meban Kharsotti u la thep ar kol ha ka minit kaba 9 & 34, katba ïa kiwei pat la pynbud da u Bony Lyngdoh (36) bad Neviki Phawa (56).
Haba phai sha ka 2nd Division, ka Moosalyngkat ka la pynliem ïa ka Mupliang lyngba ka shi kol ba la thep da Clifford Myrchiang ha ka minit kaba 27.
