Jowai, Nailar 27
Ka lympung ïalehkai 2nd Division bad Super Division Football Tournament ba la pynïaid da ka Thadlaskeiñ Sports Association (TSA) ka la nangjan shaphrang ha ka sngi Balang ha madan Multi Sports Complex.
Ha ka jingïalehkai jong ka 2nd Division, ka Ïawpynsin Wahïajer ka la pynliem noh ïa ka Mukhla Wahshnong da 3-2. Ïa ki kol jong ka Ïawpynsin Wahïajer la thep da u Markatjuh Dkhar (23), Ïohkmen Mynsong (65) bad u Donbok Ïakai (70). Katba na ka Mukhla Wahchnong la ïarap pynthep da u rangïalehkai ka liang pyrshah u Lumlang Nongpluh (30) kawei pat da u Rolling Nongrum (48).
Ha ka jingïalehkai kaba bud, ka Namdong-A ka la pynliem noh ïa ka Iongshiwiat da 6-1 kol. Ïa kine la ïarap pynthep da u rangïalehkai ka liang pyrshah u Paitlang Dkhar (21), katba ïa kiwei pat la thep ar kol da u Starwell Sungoh (27 & 52), kumjuh u Phien Dkhar (50), Bormi Myria (65 & 70). Na ka liang ka Iongshiwiat la thep da u Ebormi Suja (3).
Haba phai sha ka Super Division, ka Nongkhroh Krem Kum ka la pynliem noh ïa ka Mookyndur da 3-0 kol. Ïa kine la thep da u Anthony Mynsong (10), Tanlangki Kmah (49) bad u Teilang Pyngrope (90+1).
Ha ka sngi Palei ka jingïalehkai ha ka 2nd Division kan long hapdeng ka Mainroad Wahïajer bad Ïawthymblein ha ka por 10 baje mynstep, ka Niriang United bad Nongdhar Nongthymme ha ka por 12 baje mynsngi, katba ha ka Super Division ka Mukhla Raij bad Pohskur Phlongïingkhaw ha ka por 3 baje nohphai sngi.
