Ka hok bad ka jingshisha kam ju kham leh noh ei thala. Ka jingbym bud thikna ïa ka lynti kaba dei ka ïalam shaka jingjot bad ka jingtroiñ ha kiba bun ki bynta ha ka jingim kaba man la ka sngi ha ngi ki briew. Bun bunsien ïa ka hok bad ka jingshisha ngim sngewtynnad bad ngi kyntait bad ngi pynsñiewdur katba ïa ki kam kai bym dei ngi ïaroh bad ngi kloi ban pynmih madan ba ki long kiba bit ban bud. Ka jingbym leh hok phla hok ïa kano kano kam ka ïalam sha ka jingtroiñ ha ka imlang ka sahlang.Ka pynhiar bad pyntroiñ ïa ka dustur ka riti, ka pynhiar kyrdan ïa ka ktien ka thylliej,ka pynhiar ïa ka kamai kajih bad ka rep ka riang ruh kam roi. Ka khaïi ka pateng ruh kam kiew, ka pule ka dangle ruh ka sahdien,ka koit ka khiah ruh kam ïoh bor bad ka ring swai. Ka kur ka jait ruh ka shah budnam bad bun kiwei kiwei kiba pynthohbria ïa ka jingïatiplem jong ngi ki briew. Namar ngim phla ïa ka jingshisha bad ïa ka hok, kumta ka pynjot ïa ka longrynïeng bad ïa ka jingim ba shida jong nga jong phi. Bun eh kiba kham sngewtynnad ïa kiei kiei ki bym dei ha kane ka pyrthei.
C. B. Iawphniaw
