Shillong, Nailar 27
Ka Composite Regional Centre for Skill Development, Rehabilitation and Empowerment of Per-sons With Disabilities (CRCSRE), Shillong, ha ryngkat ka jingïatreilang bad ka ophis jong u Commissioner for Persons with Disabilities, ka Sorkar Meghalaya, ka la pynlong ïa ka Purple Fair ha ka sngi Balang ha U Soso Tham Audito-rium.
Ka jingpynlong ïa ka Purple Fair ka dei ha ka sien kaba ar ha Megha-laya, ha kaba nyngkong la pynlong ha Ri-Bhoi ha ka 1 tarik Nailar, bad kaba lai pat la buh ban pynlong ha Jowai, West Jaiñtia Hills, ha ka 17 tarik Nailur. Kane ka jingthmu ha kaba kut kan kynthup ïa baroh 12 tylli ki district jong ka jylla.
Kane ka jingïalang ka la sakhi ïa ka jingïashim bynta jong kumba 687 ngut ki nongwan, kynthup ïa ki 325 ngut ki briew kiba don jingduna ha ki dkhot met, ki bahaïing hasem jong ki, ki nongsumar, bad ki nongmihkhmat na ki seng treimon sngewbha ha kylleng ka thaiñ, da kaba ïashim bynta ha ki prokram kolshor, ki jingpyni sap bad ki jingpyninam.
Kane ka fair ka long kum ka rynsan kaba thymmai ban rakhe ïa ki jingtbit, ki sap, bad ki jingthmu seng kam seng jam jong ki briew kiba don jingduna ha ki dkhot met (PwDs) katba ka pynroi ruh ïa ka jingïakren halor ka jinglah ban ïoh, ka jingpynrung lang, bad ka lad kaba ïaryngkat.
La buh 20 tylli ki stall kyrpang na ka bynta ki briew kiba don jingduna ha ki dkhot met ban pyni ïa ki mar, ki buit shna jingshna, bad ki jingnoh synñiang jong ki na kylleng ka jylla Meghalaya bad ka thaiñ shatei lam-mihngi.
Ïa kane ka prokram la wan ban plie paidbah da u Bah Paul Lyngdoh, Myntri ka tnat Social Welfare bad uba long ruh kum u Kongsan, ha ryngkat ki heh ophisar Sorkar, ki seng treimon sngewbha, ki kynhun ïarap ïalade, bad kiwei kiwei ki nongshim bynta kiba trei ha ka liang kiba don jingduna ha ki dkhot met.
La don lang ruh ka Kong Camelia Doreen Lyngwa, MCS, kaba dei ka Director jong ka tnat Social Welfare, u Bah L Kynjing, MCS, Commissioner PwDs bad ka Kong Dalikynti Kharshiing, MCS, Additional Deputy Commissioner ka East Khasi Hills District bad ka Kong Bridget Warshong, Deputy Commissioner for Persons with Disabilities ka Sorkar Meghalaya.
Haba ai jingkren ha kane ka sngi, u Bah Paul Lyngdoh u la pynskhem biang ïa ka jingangnud jong ka Sorkar Jylla na ka bynta ka jingbha jingmiat, ka jingroi bad ka jingpynkupbor ïa ki briew kiba don jingduna ha ki dkhot met, da kaba ban jur ba ki dei ki dkhot ba kordor jong ka imlang sahlang kiba dei hok ban ïoh ïa ka jingsngewrit, jingieid bad jingsumar ym tang ka jingsngewrit.
“Na ka liang jong nga hi, bad khamtam eh na ka liang ka Sorkar Jylla Meghalaya, nga kwah ban pynthikna ïa phi ba ka Sorkar ka aiti pura ïa ka bha ka miat, ka jingmyntoi bad ka roi ka par jong ki briew kiba don jingduna ha ki dkhot met. Ngi la kut jingmut ban pynneh pynsah ïa ka mariang kaba leh ïa phi kum ki dkhot ba kyrpang jong ka imlang sahlang-da ka jingsngewrit, jingieit bad jingsumar”, ong u Myntri.
Na ka liang ka Kong Lyngwa ka la ïasam ïa ki jingtip ba thymmai halor ki jingpynkylla polisi bad ki jingthmu ba dang shen kiba thmu ban kyntiew ïa ka jinglah ban shaniah ha lade bad ka burom hapdeng ki briew kiba duna dkhot met.
