Shillong, Nailar 27
U President ka Hill State People’s Democratic Party (HSPDP) Bah KP Pangniang, kaba dei ruh ka seng kaba ïatreilang bad ka Sorkar MDA-2, u la pynpaw ba lada kam don jingktah ïa ka bor synshar, ka seng ka sngew ba ka long kaba biang palat ban siew tulop hi ka Sorkar ïa ki nongtrei jong kine ki lai tylli ki Autonomous District Council.
U la ong ba ka HSPDP ka kwah ban pynkhlaiñ ïa ki lai tylli ki District Council hapoh ka jylla kumta lada ka Sorkar ka kwah ban siew tulop ïa ki nongtrei jong ki lai tylli ki District Council kam dei pat ban knieh ne ktah ïa ka bor ba la ai ha ki kumba la pynkup bor da ka 6th Schedule ka riti synshar jong ka Ri.
U la ong ba ka Sorkar Jylla ka don ka jingsngew kitram haba ki ar tylli ki Autonomous District Council kim lah ban siew tulop ïa ki nongtrei kata ka GHADC bad JHADC.
U la ong biang ba haduh mynta ka KHADC ka dang biang hynrei ym pat tip ïa ki por ban sa wan ïoh kane ka ktah lang hynrei lada dei beit thik tang ïa ka tulop ka long kaba biang hynrei ban knieh noh ïa ka bor synshar kata kam lah ban long.
Shuh shuh ka seng kan sa shong jingïalang ïa kane ka jingthmu ka Sorkar bad kan sa leit ïakynduh ïa ki bor Sorkar ban pan jingshai shuh shuh ïa kane ka jingthmu ba bha jong ka Sorkar.
