Shillong, Nailar 27
Ki ar kol kiba la thep da u Freelyson Tariang, ki la biang pura ïa ka Laitkor SC ba kan pynliem noh ïa ka Mylliem SC da 3-1 kol ha ka Shillong Premier League 2025 kaba la long ha ka sngi Balang ha SSA Stadium kaba ha First Ground, Polo.
Ïa kine ki ar kol, u Freelyson u la ïoh ban thep ha ka minit kaba 52′, 76′ bad sa kawei shi kol la ïoh ban thep da u Risul Malngiang ha ka minit kaba 71, katba ïa ka shi kol ka Mylliem la ïoh ban pynphai shwa ban wan lyngba ka free-kick da u Wanbok Wahlang ha ka minit kaba 85.
Haba phai sha ka jingïakhun, tad haduh ba kut ka kylla step, kine ki ar kynhun kim shim la lah ban ïapynkhih satia ïa ka jar, hadien ba ka jingïakhun ka long ba baroh ar ki long kiba ïa biang bad khlaiñ bor bha.
Kine ki ar kynhun ki la wan rung sha kane ka jingïakhun hadien ba ha ka kylla ïakhun ba nyngkong ha kaba ka Laitkor SC ka la liem noh da 1-0 kol ha ka Malki SC, katba ka Mylliem ka la ïakhaid da mar 1-1 kol bad ka Langsning FC.
Hynrei haba wan ban bteng ïa ka kylla miet, ka kynhun ïalehkai jong ka Laitkor, ka la kyntiew bha ïa la ka jong ka rukom ïalehkai ka jong ka, bad ka la pyndonkam hok ïa ka kabu ksiar na ka daw ka jingtlot ka kynhun ïalehkai jong ka Mylliem, khamtam eh ha ka bynta kaba shadien.
Hadien ba ka Laitkor ka la ïoh ban thep ïa kine ki kol, na ka liang ki rangïalehkai ka Mylliem, ki la pyrshang ban khie khlieh ha kaba ka la ïoh ïa ki katto katne ki kabu ksiar na ka bynta ban pynphai, hynrei kim shym la lah ban pynurlong. Ka Mylliem ka la ïoh ban shut ïa ka free-kick, ha kaba u Wanbok, u la shut bha jai ïa ka bol kaba la suh beit shapoh ka kol ka Laitkor bad ka la rung sha kol.
Da kane ka jingjop, ka Laitkor ïa mynta ka la lait shabar u line saw (relegation zone) hadien ba kan kiew sha ka kyrdan kaba san, katba na ka Mylliem lyngba kane ka jingshah rem, ka pynlong ia ka ban hiar sha ka kyrdan kaba phra.
Ka jingïalehkai ha ka sngi Palei kan dei artad ka kylla ïakhun kaba lai (Rd-3) hapdeng ka Nangkiew Irat pyrshah ïa ka Sawmer SC, ha ka por 4:30 nohphai sngi.
