Shillong, Nailar 27
Ka kynhun myntri jong ka Sorkar Pdeng hapoh ka jingïalam u Myntri Rangbahduh ka ri u Narendra Modi, ka la mynjur ban phah ka jingtyrwa ban pynlong ïa ka Commonwealth Games ha u snem 2030 ha Ahmedabad kaba ha Gujarat.
Kane ka rai kaba la pynbna ha ka sngi Balang, ka kynthup ïa ka jingmynjur ban soi ïa ka ‘Host Collaboration Agreement’ bad ban ai jingïarap ïa ka sorkar Gujarat, lada kane ka jingthep tyrwa ka long kaba jop.
Ha kane ka Commonwealth Games la khmih lynti ba kin don haduh 72 tylli ki ri ka pyrthei ki ban wan shim bynta bad yn pyndonkam ïa ki jaka kynthup ïa ka stadium kaba heh tam ha ka pyrthei.
Ka Kynhun Myntri ka la ai bor ïa ka tnad ïalehkai ban ïaid shakhmat ha kaba ïadei bad ka jingthep ïa ka ‘bidding’. Ka jingmynjur ka kynthup ïa ka jingsoi ïa ki jingkular kiba donkam na ki tnad treikam bapher bapher, bad ki jingkyrshan ban pdiang ïa katei ka lympung kaba heh ha ka pyrthei.
Kumba ka paw ka Ahmedabad ka la shah jied kum ka nongbah ba la tyrwa ban pynlong ïa ka Commonwealth Games ha u snem 2030. Ki jingtei jong ka nongbah ki kynthup ïa ka Narendra Modi Stadium, kaba la pyni ïa ka jinglah jong ka da kaba pynlong ïa ka jingïalehkai final jong ka ICC Cricket World Cup ha u snem 2023.
La thmu ba kane ka jingïalehkai kan khring ïa ki nongïalehkai ba paw ka pyrthei, kynthup ïa ki nongïalehkai, ki coach, ki nongpynïaid (technical officials), ki nongjngohkai pyrthei, bad ki nongthoh khubor. La ong ba katei ka lympung kan long ka jingmyntoi kaba khraw ha ka ïoh kam ïoh jam ha ka khaii pateng bad kan pynmih ïa ka khajna ïa katei ka Jylla.
“Nalor ki jingïalehkai, ka jingpynlong ïa ka CWG ha India kan ïarap ban kyntiew ha ki kam jngoh kai pyrthei, ka ban ai kam ai jam bad ka ban pynshlur bad ai mynsiem ïa ki million ngut ki samla ïalehkai,” la ong kat kum ka jingpyllait da ka Press Information Bureau.
“Ka jingpynlong ïa kum kane ka jingïalang kaba paw ha ka pyrthei kan long ka jingsngew sarong ïa ka ri bad kan wanrah ka jingïatylli ha ka ri hi baroh kawei.”
