Shillong, Nailar 27
Ka jingsniew palat ka surok narum Phlangwan-broi shaduh Dangar, Balat bad shaduh Lait-umsaw kaba hap ha Maw -synram Konstitwensi, East Khasi Hills district ka la pynlong ïa ki briew kiba nabar ka Mawsyn-ram Konstitwensi ban kylli shwa ïa ka surok lada ki kwah ban leit sha thaiñ Dangar.
Ka surok na Maw-synram shaduh Balat ka dei ka surok kaba la slem kaba haduh mynta ka dang neh beit kumjuh hynrei haduh mynta ka Sorkar Jylla kam shym la pyrkhat ban shna bha na bynta ka jingmyntoi jong ki paidbah.
Haba u nonglum khubor U Nongsaiñ Hima u la hiar sha kane ka thaiñ u la ïoh ban kren bad ki katto katne ki nongshong shnong bad ruh ban ïakynduh ïa u Paiem Kynsai Syiem, Syiem ka Hima Bhowal bad ïa ki katto katne ki nongïalam shnong kiba dang hap hapoh ka jingpeit ka Hima Bhowal kata ïa ki nongïalam shnong Dangar bad Laitumsaw ban ïakren ha kaba ïadei bad kane ka jingsniew palat ka surok.
Na ka liang u Paiem Kynsai Syiem haba ai jingkren u la ïathuh ba kane ka surok ka la sniew shaba palat khamtam ha ka por lyiur bad ka ïaid ka ïeng ka long kaba jynjar bha khamtam ïa kiba pang kiba shitom, ki longkmie kiba armet namar ka jingsniew shaba palat kane ka surok.
U la ïathuh ruh ba mynta u snem ka dei kaba la jur palat ka jingjot ka surok haba ïanujor bad ki snem kiba la dep bad ka daw kaba pynsniew ïa ka surok ka dei namar ka rukom maramot ha ki por tlang ka long tang malu mala bad ynda poi ha ki por lyiur ka sniew noh.
Shuh shuh u la ong ruh ba kumba long mynta ki don ki trok kiba ïaid da ki phew phew tylli kiba kit palat pud bad kane kadei kawei ka daw kaba pynjot ïa ka surok.
Kumta u Paiem u la kyntu ïa ka Sorkar ba ka dei ban phai khmat lem sha kane ka thaiñ ban pynbha ïa ki surok bad wanrah ruh da ki projek lane ki skhim kiba heh.
Katba ki nongïalam shnong ki la ïathuh ba kane ka surok naduh mynshwa ka dang long kumjuh shi kumjuh bad ka la don ka jingïakren bad ki bor Sorkar ban pynbha hynrei ka shu kut tang ha ka ban maramot.
Shuh shuh u la ïathuh ba haba kynduh ïa ki briew kin kylli beit shwa ïa ka surok ka la long kumno hynrei ka jubab ka long beit kumjuh.
