Shillong, Nailar 27
Ka India ka la nangjan ban rah ïa ka nam lahduh ha ka SAFF U-17 Women’s Championship 2025, hadien ba ka la pynliem biang sa shisien pat ïa ka Bhutan da 5-0 kol ha ka jingïalehkai kaba saw jong kane ka lympung, ha ka sngi Balang ha Changlimithang Stadium kaba ha Thimphu.
Kane ka long ka sien kaba ar ba kine ki kynhun ki la ïakynduh bad ha ka jingïalehkai ba nyngkong ka India ka la jop haduh 8-0 kol.
Ki ar ngut ki ‘thei ïalehkai ka jylla Meghalaya kata ka Bonifilia Shullai lem bad ka Alisha Lyngdoh ki la ïoh mih madan ban ïalehkai lang na ka bynta ka kynhun ïalehkai ka ri.
Pynban ha kane ka jingïakhun kaba ar ka la lah ban ïalehkai bha naduh kaba sdang ha kaba ka Anuskha Kumari ka la thep ar kol ha ka minit kaba 4′ & 16′. Ïa kiwei pat ki kol la thep da ka Shveta Rani (24′), Julan Nongmaithem (77′) bad ka Nira Chanu Longjam (90+5′).
Kumba ka long mynta ka India ka la lah ban thep haduh 22 kol bad kam shym la shah thep wat tang shi kol ruh. Te kumta ka India ka la ïoh ban bat ïa ka kyrdan ba hakhlieh da kaba kamai 12 poiñ na ki saw sien ïakhun da kaba tam ïa ka Bangladesh (9 poiñ) ha ka kyrdan ba-ar, bud sa ka Nepal (3 poiñ) bad ka Bhutan kaba dang ïai mad ïa ka jingshah rem.
