Shillong, Nailar 27
Kumba 3332 tylli ki skul SSA – Lower Primary bad Upper Primary ki la pynpaw ïa ka jingkwah ban aiti noh ïa ka jingpynïaid sha ka Sorkar Jylla wat haba ka tnad pule-puthi ka la rai ban aiti noh shen ïa ka jingtyrwa halor ka rukom siew tulop na bynta palat 14,000 ngut ki nonghikai SSA ha ka Jylla.
Ïa kane la pyntip da u President ka Meghalaya SSA Schools Association (MSSASA), Bah Aris-totle C. Rymbai hadien ka jingïalang ba la khot da u Commissioner & Secretary ka tnad pule-puthi, u Vijay Kumar Mantri ha ka Sngi Balang.
Haba kren sha ki nongthoh khubor hadien ka jingïalang, u Bah Rymbai u la ong ba ka tnad ka la ïasam ïa ka jingbatai bniah halor ki 4 tylli ki mat ba kongsan, ba kynthup ïa ka jingshimti ïa ki skul SSA kiba long trai da ki ‘riew shimet, ka jingsiew ïa ki nonghikai SSA, ka jingpynbeit ryntih ïa ki skul SSA bad ki skul Sorkar, lem bad ka jingthoh ‘Cabinet Memorandum’ na bynta ka jingpynkynriah haba ïadei bad ka jingpynïaid skul.
“Ka tnad ka la ïoh pdiang ïa ki NOC na 3332 tylli (na ki 5131) ki skul SSA kiba pynpaw ïa ka jingkwah jong ki ban aiti noh ïa ka jingpynïaid sha ka Sorkar Jylla,” u la pyntip.
“Na kine, 3034 tylli ki dei ki skul SSA ba la pynïaid da ki paidbah ha ka imlang-sahlang bad 298 tylli pat ki dei ki skul SSA ba la pynïaid da ki niam bad ki ‘riew shimet,” la bynrap biang u Bah Rymbai.
Ha kaba ïadei bad ka jingdawa jong ka seng, u Bah Rymbai u la ong, “Ngi sngewkmen ban ïohsngew na u Commissioner & Secretary ba ïa ka jingtyrwa haba ïadei bad ka rukom siew ïa ki nonghikai SSA la pynkhreh bad yn sa phah sha ka tnad pla tyngka bad ka Kynhun Myntri ban ïoh ïa ka jingmynjur hadien ka Dorbar (ban wan).”
“Ka tnad ka la ïasam ruh ïa ka jingbatai ha kaba ïadei bad ka ‘Cabinet Memorandum’ ban shimti ïa kito ki skul SSA, kiba la dep ban aiti ïa ka jingkwah jong ki – ban aiti ïa ka jingpynïaid na ka SSA sha ka Sorkar. Ïa kane ka ‘Cabinet Memorandum’ yn sa phah sha ka Kynhun Myntri hadien jong ka Dorbar,” u la bynrap.
U Bah Rymbai u la pyntip ruh ba ka tnad ka la sdang ïa ka kam ban pynbeit ryntih ïa ki skul SSA bad skul Sorkar, da kaba phah ïa ki nonghikai na ki skul ‘single-digit enrolment’ sha kiba kham heh ne ‘higher enrolment’.
“Ha ka jingshisha, ha kawei ka liang ngi sngewkmen ïa ka jingïaid shakhmat jong ki kam ba la leh da ka tnad,” u la ong.
U Bah Rymbai u la pyntip ruh ba ka seng ka la pynpaw ïa ki jingsngewkhia ha kaba ïadei bad ka jingpynbeit ryntih ïa ki skul kiba treikam ha kajuh ka ïingmala ne ‘Campus’, khamtam ha kaba ïadei bad ka jingsiew tulop sha ki nonghikai SSA.
Na ka liang u Commissioner & Secretary u la pyntikna ba ka rukom siew tulop ba mynta kan ïai bteng, bad ïa ka tulop ki nonghikai SSA yn phah beit sha ki ‘Personal Account’ jong ki, u la ong.
Shuh shuh u Bah Rymbai u la ong ba ka MSSASA ka khmih lynti ban ïoh shuh ïa ki jingtip bathymmai halor ka rukom siew tulop hadien ba la pynmih ïa ka kaiphod jong ka ’16th Finance Commission’ – kaba la khmih lynti (ban pynmih) ha ka taïew ba khatduh jong u bnai Risaw.
Nalor kane, yn khot ruh ïa ka jingïalang ha u bnai Risaw ban ïakren halor ka kaiphod bad ban ïasam ïa ki jingtip ba bniah halor ka rukom siew tulop, u la bynrap.
