Guwahati Nailar:
Ka sorkar Assam, ha ka 26 tarik u Nailar, ka la pynlong ïa ka jingpynkynriah ïa ki briew hapoh ka khlaw Rengma Reserve ha Golaghat distrik, ha kaba la pynkynriah ïa jan 230 tylli ki longïing bad pynkhuid ïa ki katto katne hectare ki jaka na ki nongskud jaka da ka lynti kaba beaiñ, la ïathuh ki heh sorkar.
Kane ka jingkhynra ka dei shi bynta jong ka bynta kaba ar jong ka jingpynkynriah jaka ïa ki briew, kaba la sdang naduh ka 18 tarik u Nailar, ban pynduh ïa ki jingshna ïing beaiñ na ki jaka khlaw kiba heh kumba 26 hectare. La pynsangeh shipor kham mynshwa namar ba ki longïing kim shym la iehnoh ïa ki jaka sah jong ki, ong u heh ophisar.
“Ka bynta kaba ar jong ka jingpynkynriah briew ha Golaghat distrik ka la long kaba jop ha kane ka sngi, da kaba thmu ïa ki jingwan rung be-aiñ ha ki jaka No. 1 Madhupur, Rana Nagar bad Hatidubi jong ka khlaw Rengma Reserve,” la ong ka jingpynbna paidbah.
Ha kane ka jingkhynra, ki bor pynïaid ki la pynpra ïa 80 tylli ki ïing ha Madhupur, 44 tylli ha Rana Nagar bad 104 tylli ha Hatidubi. Ki la pynpra ruh ïa ki jingtei bym don jingbit kiba la saphriang ha “katto katne hectare jong ka jaka khlaw ba la pynbna bad buh jingmaham”.
“La ai jingpynbna lypa sha ki nongwan rung tuh bad la pynlong ïa ka rukom treikam ha ka rukom kaba shai ban pynduna ïa ka jingpynthut. Kane ka bynta ka dei ka sienjam kaba kongsan ha kaba pynphai biang ïa ki jaka khlaw ba la wan rung tuh bad ban pynphai biang ïa ka jinglong jingman jong ka mariang lyngba ka jingdon jong ki khlaw sorkar,” ong ka kyrwoh.
Ïa kane ka jingpynïaid la buddien da ki heh ophisar, ba kynthup ïa u Special Chief Secretary (Forest) u M K Yadava, bad ki heh nongmihkhmat na ka Forest Department, CRPF, Assam Police bad ki bor pynïaid distrik.
“Kane ka jingtreikam ka pyni ïa ka jinglong skhem jong ka sorkar jylla ban pyntreikam ïa ki aiñ ïada khlaw bad ban shim biang ïa ki jaka ba la shah kurup,” ka la ong.
