Shillong, Nailar 27
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka, shah prong tuh ki ïing, ki dukan bad kiwei ki kam tuh na kylleng ki jaka.
Katkum ka khubor kaba la ïoh na ki pulit la ong ba u Bah Wansawlang Lyngdoh u la ai ka jingujor ba ha ka 22 tarik mynta u bnai ha ka por kumba 3.45 dang step, ki runar bym lah ban ithuh, ki la tuh ïa ki shaka na ka kali jong u, kaba don ïa u registration number ML05-K-7621 ha Lumshatsngi, Shillong.
U Rajeev Kumar u la ai ka jingujor sha ki pulit ba ha ka por dang step jong ka 25 tarik mynta u bnai, ki runar bym lah ban ithuh, ki la prong tuh hapoh ka ïing ka jong u, kaba don ha Dongkadiang, Nongmensong, Shillong bad ban tuh ïa ka ksiar kaba shongdor kumba T.1 lak, ka pisa kaba long T.40,000/- bad kawei ka mobile phone.
Kumjuh ruh na ka liang jong u Dr. Kamaljeet Singh Sehdave u la ai ka jingujor ba ha ka miet jong ka 24 tarik mynta u bnai, ki runar bym lah ban ithuh, ki la prong tuh hapoh ka dukan ai dawai ne ka Dental Clinic kaba don ha Laitumkhrah Market, Shillong bad ban tuh ïa ka pisa kaba long T.2,520/- bad lai tylli ki Dental Evaluation (FACeP) kiba shongdor kumba T.4,500/-.
Ka Kong Angela Kharnaior ka la ai ka jingujor sha ki pulit ba ha ka 25 tarik mynta u bnai, ki runar bym lah ban ithuh ki la tuh ïa ki pipe bad kiwei ki tiar na 1st MLP Bn., UP & Secondary School, Mawiong, Shillong.
Ka Kong Durga Suchiang ka la ai ka jingujor ba ha ka step jong ka 25 tarik mynta u bnai, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML04-D-4135 na ka thaiñ Mihmyntdu ha West Jaiñtia Hills.
