Shillong, Nailar 27
Ka United Democratic Party (UDP) shen kan sa shim ïa ka rai halor ka sienjam jong ka Sorkar ban siew tulop noh sha ki nongtrei jong ki lai tylli ki Autonomous District Council (ADC).
U General Secretary ka UDP, uba dei ruh u nongïalam ka Liang Pyrshah ha Khasi Hills Autonomous District Council (KHADC), Bah Titosstarwell Chyne u la ong ba ka seng ka la ïakynduh ha ka Sngi Ba-ar bad rai ban pynbeit ïa ka jingïalang ban ïakren sani bha halor kane ka jingtyrwa jong ka Sorkar.
“Ka thong jong ka jingïalang ka long ban pynshai ïa ki jingthmu jong ka Sorkar, naba ki Myntri ka UDP kim shym la don ban ai jingmut ha ka por ba sdang jong ka jingïakren,” u la ong.
U Bah Titos u la pyntip ba ka Parliamentary Party jong ka UDP ha KHADC ka la pynbeit ban ïakynduh hadien ka 7 tarik u Nailur, ha kaba yn sa bishar bniah ïa katei ka mat, bad yn sa shim pat ïa ki rai hadien kane.
Katkum ka jingong jong u, ka seng kan sa pyrkhat bha halor katei ka mat hadien ka jingïamir jingmut kaba bniah.
Ka Sorkar Jylla ka la thaw ïa ki lai tylli ki ‘Sub-Committee’ ban ïakren bad baroh ki ADC halor katei ka jingtyrwa bad ban ai ïa ka kaiphod hapoh 45 sngi.
