Jowai, Nailar 27
Ka ïingbishar u N.A. Khan, District & Session Judge, West Jaiñtia Hills, Jowai, ha ka 25 tarik Nailar ka la rai pynrem da kaba set phatok shi jingim ïa u Weslyborn Pala ba ju khot sin u Nana Pala uba dei na ka shnong Barato namar ka jingdonkti ha ka kam pynïap briew.
U Superintendent of Police ka District u la pyntip ba kane ka jingjia ka dei kaba la jia ha u snem 2009 hadien ka jingmudui ejahar da ka Kong Eragina Timung kaba dei ka khun jong u lanot ba shah pynïap ha u In-Charge ka Nartiang Police Investigating Centre (PIC) ha ka 07.08.2009.
Ka la ïathuh ba ha ka 06.08.2009 ha ka por kumba 8 baje mynmiet utei uba shah kynnoh donkti (Weslyborn Pala) u la pynïap dusmon ïa u kpa jong ka u Bransely Suiai da kaba pom da ka wait haduh ba un da ïap hashen.
Ïa ka case la register hapoh ka thanad Jowai katkum ka Case No. 111(8)09 U/S 302 IPC bad la tohkit bad charge-sheet da u Sub Inspector W Vaichel.
Hadien ka jingtian bishar, ka ïingbishar ka la pynskhem ïa ka jingdonkti jong u Weslyborn Pala ha kaba pynïap ïa u Bransely da kaba pynmih ïa ka hukum ban set phatok shi jingim ha ryngkat ka kuna kaba T.5000.
