Nongstoiñ, Nailar 27
Ki kynhun bapher-bapher na West Khasi Hills (WKH) ki la aiti ïa ka dorkhas sha u Myntri Rangbah ka Jylla, u Conrad K. Sangma ban kyrpad pyndep ïa kawei ka surok kaba la sahteng la slem hapdeng ki shnong Shallang sha Khalu lyngba ka Rengdim.
Ka projek, katkum ka jingong jong ki, ka la sahteng la palat shiphew snem, kaba la wanrah ïa ki jingeh kiba khraw ha ka liang ki lad pynïasoh. Ka hap hapoh ka PMGSY ha ka Shallang C&RD Block. Ïa kane ka jingujor la ujor da ka United A.chik Youth Federation (U.A.Y.F) bad ka All Khasi Hills Nokma Welfare Associa-tion (AKHNWA) bad la aiti ha ka Sngi Balang.
“Ka surok ka la sah kumto khlem pyndep la palat shiphew snem bad tang kumba shiteng, haduh Rengdim la pyndep. Ka jingjrong baroh ka long kumba 29-30 km. Ka dei kaba la dep siang rong haduh Rengdim ryngkat ka jingtrei khyndew kaba la pyndep haduh Khalu. Ïa kane ka projek la sdang ha u snem 2012 bad naduh kata ka por ym shym la ïohi ïa ka jingtyllun jong ki kam palat ïa ka Rengdim, ha kaba la dep ban siang rong. Kumba 40% jong ka surok ka dang sah kumto khlem ka jingsiang rong,” la ong ki kynhun.
Shuh shuh, ki 4-5 tylli ki jingkieng kiba la mynjur na ka bynta ka surok ruh ki dang sahkut khlem da lah ban pyndep.
“Namar ka jingbym lah ban pyndep pura ïa kane ka surok bad ki jingkieng, ki paidbah na ki katto-katne ki shnong jong kito ki thaiñ ki ïakynduh jingeh shi kat dei ha ka liang ka leit ka wan. Ki nongshong shnong kim banse ban hap ïaid ïa ka jingjngai kumba 13-16 km da ka kjat na bynta ban leit ïew bad ban leit die (man ka sngi) ïa ki mar rep jong ki ha Ïew Shallang,” ki la bynrap.
Kaba kham sniew shuh-shuh ka long ba ha ka por slap, ka leit ka wan da ki kali ha kane ka surok ka long kaba eh bah namar ka jingbtuid jong ka. Ban leit sha ophis C&RD jong ka Shallang ne kiwei-kiwei ki ophis Sorkar ka long ka bym lah ban mutdur na ka bynta kito kiba hap ban pyndonkam na ka por sha ka por ïa ka surok.
Kitei ki kynhun seng lyngba ka jingujor jong ki, ki la kyntu ïa u Myntri Rangbah ban tuklar ïa katei ka kam bad ban ïarap pynïoh ïa ki ïa ka surok kaba pura, kynthup ïa ki jingkieng.
