Nongstoiñ, Nailar 27
Ka Hynñiewtrep Youths’ Council (HYC) Maweit Circle kala kyntu ïa ka tnat Labour ba kam dei ban ai ‘labour licence’ ïa ki bar Jylla kiba leit bylla sha ka thaiñ Maweit.
Ki nongïalam ka HYC ki la pynpaw ba halor kane, ha ka 27 tarik mynta u bnai kala ïoh ban leit ïakynduh ïa u Inspector Labour, Nong-stoiñ, West Khasi Hills District ban ïakren bad pynsngew ïa katei ka bynta.
Shuh shuh la ong ruh ba na ka liang ka HYC Maweit Circle hapoh ka jingïalam u samla Shem-phang Tyrsa, President, kala leit ban kyrpad ban nym ai NOC ïa ki bar jylla kiba kwah ban wan trei hapoh thaiñ Maweit namar mynta katkum ka jinglap jong ka seng lyngba ka SLO (Sier Lapalang Opera-tion) la don shibun ki barjylla kiba wan trei beaiñ hapoh ka thaiñ khamtam ha kine ki sngi ba la sdang ban pyntrei ïa ki coke factory hapoh ka thaiñ.
“Ngi kyntu jur ïa ka tnat ba dei peit ban nym ai NOC, namar ngim kwah ba ka thaiñ Maweit jong ngi kan long kum kiwei kiba ki barjylla ki wan knieh ïa ka hok bylla ki para thaiñ,” ong ki nongïalam ka HYC.
Ki la ïathuh ruh ba watla ka seng kam ïakynduh ïa u Inspector hynrei ka la ïoh ïakynduh ïa uwei na ki ophisar ha kaba u la kular ban shimkhia ïa kane ka jingkyrpad ka seng.
Shuh shuh ki la ong ruh ba ka HYC kan buddien ïa kane bad kan ym ailad ba ki bar jylla kin wan knieh ïa ka hok jong ka thaiñ.
