Doha, Nailar:
U Myntri kam bar ri jong ka Qatar, haba ai jingkren sha ki nongthoh khubor ha ka Sngi Balang, u la ong ba katkum ka jingpeit thuh ia ka jinglong- jingman jong ka Israel bad Hamas ha kane ka kynti, la ithuh ba ka Israel kam kwah ban poi sha ka jingïateh kular kaba bha bad kam pat kwah ban pynkut noh ia ka thma namar kam shym la ai jubab eiei halor ka jingtyrwa sangeh ïasiat, kaba la mynjur lypa da ka Hamas ha kaba sdang jong une u bnai.
Katba ka Qatar ka kular ban dang ïai bteng ïa ki jingpyrshang ban pynkut noh ïa ka thma jong ka Israel hapoh ka nongbah Gaza jong ka Palestine, kaba la shim ïa palat 62,000 ngut ki mynsiem briew ha katei ka nongbah, u nongaiktien jong ka tnat treikam, u Majed al-Ansari, u la kyntu ïa ki ri ka pyrthei baroh ba kin pynbor ïa ka Israel, ba kan pdiang noh ïa ka jingtyrwa sangeh ïasiat ba khatduh eh khnang ban lait noh na kiei- kiei baroh ki kynrum- kynram kiba ka pyrthei ka la sakhi ha kine ki sngi.
Kane ka jingpynbna ka long hadien shi taiew hadien ba ka Hamas ka la iathuh ba ka dep ban pyntip sha ki nongpynïasuk, kynthup ia ka Egypt bad ka Qatar, ba ka la mynjur ïa kane ka jingtyrwa bad ka la pynkhreh ban sdang biang ïa ka jingïakren ban pynkut noh ïa ka thma jong ka Israel pyrshah ïa ka Gaza, kaba don mynta ha ka jingeh kaba khraw namar ka jingshah pynpoi wir jong ki paidbah nongshong shnong pdeng ka jingïap thngan kaba la wanrah da ka thma jong ka Israel.
