Shillong, Nailar 27
Ka Management bad ki nongtrei jong ka Salantini Janera, kaba dei ka kot khubor kaba mih man ka sngi ha ka ktien Garo ka iawer sngewbha ïa baroh ban ïa donlang ha ka jingrakhe ïa ka lyngkhuh jingdap 25 snem. Ka Salantini Janera kaba pynmih na kajuh ka shlem jong ka kot khubor “The Shillong Times” kan pynlong ïa ka prokram kyrpang kum ka dak ban pyrto ïa ka jingnoh synniang halor ban pynsaphriang ia ki khubor sha ki paidbynriew Garo bad ka jingshakri ïa ka imlang sahlang ha kine ki 25 snem. Ka prokram kyrpang ban rakhe ïa kane ka sngi kan long ha ka 30 tarik u Nailar 2025, ha Hotel Polo Orchid, Tura, naduh 12 baje nohphai sngi. U Myntri Rangbah ka Jylla, u Conrad K. Sangma, u la mynjur ban long u Kongsan katba ki nongïalam ka liang pyrshah u Dr. Mukul M. Sangma and u MP ka Tura, u Saleng A Sangma ki la mynjur ban long kum ki symbud kongsan. Ha kane ka sngi yn ïadon ryngkhat ruh ka nongpynmih ïa ka kot khubor, ka Shobha Chaudhuri and kumjuh, u Senior Sub-Editor, u Warmond Rongkrore.
