Shillong, Nailar 28
Kan long ka sien kaba nyngkong eh ïa ka Meghalaya State Olympic Association (MSOA) ba kan pynlong ïa ka jingtes ïa kiba dih ïa ki dawai kiba la maham pyrshah, ha ka 4th Sohra International Half Marathon 2025, kaba la thmu ban pynlong ha ka 27 tarik u Nailur mynta u snem.
Ïa kane la pynbna da ki nongïalam ka MSOA ba kynthup ïa u Working President Bah John F. Kharshïing bad u General Secretary Bah Finely Lad Pariat ha ka jingdonlang u Director ka tnat ïalehkai u DD Shira, ha ka jingïalang bad ki lad pathai khubor ha ka sngi Palei bad ïa kane la bynshet ha ka National Anti-Doping Agency (NADA) khnang ban pynlong ïa katei ka jingïakop kaba khuid ba suba bad kaba lait na kaba pyndonkam ïa ki dawai khleh drok.
Haba ïadei bad katei ka jingïakop, ki nongïalam ka MSOA ki la pynbna ba ki la don 6808 ngut kiba la dep thep kyrteng, kynthup ïa 1563 ki shynrang bad 682 ngut ki kynthei. “Kane ka mut baroh ki long 2245 ngut ha ka 21K, 10K bad 5K. Ha ka 5K Run for Fun ki la don haduh 2000 ngut kiba na Sohra kiba la thep kyrteng bad na ki skul ha Sohra ki la don 2563 ngut.”
Ki la pyntip ba ki don 5 ngut ki nongmareh ba kynsai na Kenya kiba la dep thep kyrteng bad baroh kiba nabar ka jylla Meghalaya kiba la dep thep kyrteng ki long haduh 142 ngut.
“Ha ka 21K Elite ki don 82 ngut ki shynrang bad 17 ngut ki kynthei tad haduh mynta. Ha ka 21K Meghalaya Open ki la don baroh 115 ngut ki shynrang bad 16 ngut ki kynthei. Ha ka 10K Open, 18 snem shaneng, ki la don 710 ngut ki shynrang bad 164 ngut ki kynthei. Ha ka 10K Open, 40 haduh 54 snem shaneng ki la don 90 ngut ki shynrang bad 46 ngut ki kynthei bad ha ka 10K Open, 55 snem shaneng ki la don 19 ngut ki shynrang bad 11 ngut ki kynthei kiba la dep thep kyrteng tad haduh mynta,” ki la bynrap.
Haba ïa dei bad kane ka Sohra Marathon, u Bah John u la pynpaw ïa ka jingsngewkmen ïa ka jingkyrshan jong ka Sorkar Jylla ïa kane ka jingïakob kaba la ju pynlong manla u snem.
“Kane ka dei ka sien kaba saw ba ki pynlong bad ka long kaba sngewtynnad ba baroh ki rangbah shnong bad ki paidbah ka thaiñ ki ïa snohkti lang na ka bynta ka jingpynlong ïa kane ka jingïakob,” la bynrap u Bah John.
Shuh shuh u Bah John u la ai khublei ïa ki paidbah ka thaiñ bad kumjuh ïa ki skul kiba la don kumba 4000 tam kiba la dep thep kyrteng na Sohra.
“Ki 5 ngut kiba na bar ri ki la dep pynthikna ban wan, ki ap sa tang ïa ka visa jong ki bad ki bun bah kiba wan nabar,” la bynrap u Bah John.
“Suki pa suki kane ka marathon ka la nangpaw bad man u snem ka la kham kiew bad khring, khamtam ïa ki nongïalehkai” U la ong.
U Bah John u la pyntip ruh ba ka surok ban leit sha Sohra kan khang naduh ka por 5 baje haduh ka por 9:30 mynstep.
