Imphal, Nailar:
Ka seng Congress ha ka 28 tarik u Nailar, ka la pynbor ban pynlong mardor ïa ka ilekshon sha ka ïingdorbar thawaiñ ha Manipur, da kaba ong ba tang ka jingbthah kaba thymmai, ka lah ban wanrah biang ïa ka jingsuk ha ka jylla, kaba la shah ktah ha ki jingïakynad.
Ha ka jingïalang paidbah ha ka kyrdan jylla kaba la ai kyrteng ‘Vote Chor, Gaddi Chor’ ha Imphal, u MP ka seng bad u nongpynïaid jong ka AICC na ka bynta ka Manipur u Saptagiri Sankar Ulaka, u la ong ba ki paidbah ki dawa ban ïoh ïa ka hok ban jied ïa ka sorkar kaba thymmai.
“Ka jingdawa jong ngi ka long kaba suk. Ngi kwah ïa ka ilekshon bathymmai ha Manipur ha kaba ki briew kin jied ïa ka sorkar jong ki bad kin pynbeit ïa ki jingeh. Kam don kano kano ka lad, kam don jingsuk mynta. Ngin ïeng ryngkat bad ka Manipur bad pynthikna ba ka jingsuk bad ka jinglong shipara kan wanphai biang sha ka jylla”, u la ong ha ka jingïalang.
U Ulaka u la kdew ba watla ka BJP bad ki paralok jong ka ki bat 55 tylli na ki 60 tylli ki konstitwensi hapoh ka ïingdorbar hynrei ka jylla ka la don hapoh ka jingsynshar President ne President’s Rule naduh u bnai Rymphang. U la buh jingkylli ruh ïa ka jingsngap jar jong u Myntri Rangbahduh ka ri u Narendra Modi halor kane ka jingeh.
“Ka Congress ka kwah ïa ka jingkren na u Myntri Rangbahduh ka ri halor lano un wan sha Manipur bad balei u sngap jar” u la ong haba kdew ba u Rahul Gandhi bad u Mallikarjun Kharge ki la leit sha kane ka jylla bunsien.
U nongïalam jong ka seng Congress u la pynbna ba ka seng kan sdang ïa ka jingïasoi ha baroh kawei ka ri naduh ka 15 tarik Nailur haduh ka 15 tarik, Risaw, ha kaba ka thong ban lum shi klur ki jingsoi ban aiti sha ka President ka ri India lane sha ka Election Commission.
U Secretary jong ka AICC, u Christopher Tilak, haba ai jingkren ha katei ka jingïalang kaba hashwa, u la kynnoh ba ka sorkar BJP, ka la leh ïa ka “jingpynkheiñ Riti synshar kaba heh tam” ha Manipur.
U la kynnoh, “Ar bnai mynshwa, ngi la don ka prokram kaba pynpaw kumno ka BJP ka jingpynkheiñ ïa ka Riti synshar ka ri. Katba ka Manipur ka dang shimkhia, ka jingpynkheiñ ïa ka Riti synshar ka ri ka la long kaba heh tam ha ka ri.”
Ka Congress ka la pynpaw biang ba kan ïai bteng ban rah ïa kane ka mat tad haduh ka jingpynbna ka ilekshon bad ban pynïoh biang ïa ka sorkar synshar paidbah.
