Shillong, Nailar 28
Ka Nangkiew Irat SC ka la nangjam shaphrang ha ka lympung ïalehkai Shillong Premier League ba la pynïaid da ka Shillong Sports Association (SSA) hadien ba ka lah ban pynliem sa ïa ka Sawmer SC da 5-1 kol ha ka sngi Palei ha SSA Stadium, Polo.
U Himanshu Patil (15′ & 42′), bad u Ronaldkydon L Nonglait (46′ & 50′) ki la thep mar ar kol bad ïa kawei pat la thep da u Banshanlang Nongdhar (48′) na ka bynta ban pynlong ïa ka Nangkiew ban lamkhmat ha kane ka lympung, katba na ka Sawmer la thep da u Bisharlang Mawthoh (18).
Kane kan dei ka sien jop kaba lai ïa ka kynhun ïalehkai jong ka Nangkiew Irat ha kane ka samoi ïalehkai ba mynta jong ka SPL, kaba pynlong ïa ka ba kan khur 9 point bad ban lah ban ïai neh halor duh ka miej ïakheiñ poiñ, katba na ka liang ka Sawmer ka la hiar sha ka kyrdan ba hynñiew hadien kane ka jingshah rem.
Ka kol kaba nyngkong kaba la thep da ka Nangkiew Irat lyngba u Himanshu kadei kaba u la ïoh ban rah shakhmat ïa ka bol ha kaba u la sah satang para marwei bad u rangapkol ka Sawmer u Pyrshang -banbha Dkhar um shym la lah ban khanglad na kane ka jingsah thep.
Pynban kane ka jinglah ban tam shakhmat da shi kol da ka Nangkiew Irat kam shim la neh slem namar ba u Dibinroy Nongspung u la ïoh ban pynbuh bol ïa u Bisharlang, uba la ïoh ban shut najngai na ka bynta ban pynphai ïa ka Sawmer.
Hadien kane, ka Sawmer ka la pyrshang ba kan ïai pynneh ïa ka rukom ïalehkai jong ka, hynrei u Himanshu sa shisien u la ïoh ïa ka kabu ksiar ban thep pat ïa ka kol kaba ar, na ka bol ba la pynbuh sha u da u Edyvenson Dhar.
Haba wan ban bteng ïa ka kylla miet, marsien sdang, ki rangïalehkai ka Nangkiew Irat ki la lap ba ïoh thep syndet haduh lai tylli ki kol tang hapdeng san minit, kaba hangne ka la khanglad syndon ïa ka Sawmer ban lah ban wanphai biang sha ka lynti jong ka jingïakhun bad haduh kaba kut ban hap ban mad ïa ka jingshah rem.
Ka jingïalehkai ha ka sngi Thohdieng kan long hapdeng ka Mawlai SC pyrshah ïa ka Langsning FC ha ka por 4:30 nohphai sngi.
